是咁的，照顧過我嘅護士死咗: 一百二十八、唔係救助
作為一個護士，十八子喺孤兒院都只係做護理工作居多，亦無參與過咩手術。
諷刺嘅係，佢作為護士，第一次親手參與嘅手術唔係救助，而係殺害。
即使依家講返，十八子仍然會耷低頭，好用力咁摙住眉心。
我對落仔完全無概念，仲繼續食緊自己碗沙律。
「當時我要遞啲儀器畀醫生，但個感覺⋯⋯好似遞緊把刀畀殺人犯。」
事實上，工具中都有手術刀。
墮胎手術分為前中後三部分。
手術前除咗塞粒藥入下體令子宮收縮之外，大部分時間都係等待，會見到等候嘅媽媽通常都好沉寂，唔會點講野。
而對第一次嚟、自己一個嚟或者特別緊張嘅女仔，十八子都會特別溫柔友善咁對待，希望可以舒緩佢地嘅不安。