是咁的，照顧過我嘅護士死咗: 一百五十九、留低嘅理由
「所以根本無必要留喺公立，只要做兩三年已經夠經驗走人。」
我好專心咁聽德仔講解。
「你知啦，依家大把人講work life balance，做公立護士同依個價值觀幾大衝突先得架。所以護士流失率好鬼高。老實講丫，阿姐我都想啦。」
德仔話每次一見到我依啲準時收工，瘋狂請假嘅冗員，再諗下自己返工連狗都不如，再諗下HA依間咁仆街嘅機構，再諗下依個咳醫療筆直再拎一萬億起個遲啲海平面上升就會沉嘅人工島嘅仆街政府，佢幾乎諗唔到唔打風流頹工而繼續捱公院嘅理由。
當然每個機構同每份工都有辣有唔辣，比如做其他機構嘅護士無咁大權力。
例如社會福利署咁樣，名義上係社工大過護士，後者只係輔助性質。
同時升職機會亦唔使諗，因為大粒嘅護士職位得一兩個，係升都未必到你升。
「留喺度嘅，一係就新人無得走，一係就想買樓因為有房屋津貼，一係就諗住做將來嘅屎忽鬼，即係羅婉儀嗰隻。屌，講起又扯火，今日又話我未夠級數同佢講野。」
「咁⋯⋯你同林林呢？你地做咗好多年喇喎。」