是咁的，照顧過我嘅護士死咗: 二百零一、一直等你

「對唔住呀，搞到個話題咁沈重。」

「唔會呀。你肯講秘密我聽，係我嘅榮幸嚟。」

林林有啲唔好意思咁耷低頭。

「我成日覺得，如果講咗自己唔開心嘅過去畀人知，咁嗰個人就要背負埋我嘅唔開心⋯⋯」

「我可以架。」





「唔？可以咩？」林林嘅秀髮晃動，傳嚟淡淡嘅清香。

「我可以幫你背負哂，你所有嘅唔開心。」

林林好似想笑，但又忍住，最後望返上天。

但我由頭到尾都只望住佢，所以見到佢抬頭向天嗰陣，展示嘅甜笑。

「遲下吖，遲下我再同你講。今日我諗都講得太多喇。」





「無問題，無論幾時，我都會聽架。」

林林點點頭，雙手一撐，跳起，落地。

「嘩，個身好似輕咗啲咁。」

或者係因為佢唔使工作。

又或者，係因為我同佢分擔咗一啲啲悲傷。





「走咯，我地。」

「林林。」今晚已經唔知係第幾次叫住佢。

「到我好返哂，我地搵一次再嚟依度吖。到時我同你一齊坐喺欄杆上面，一齊睇星星。」

佢好似個聽到爸爸會帶佢去旅行嘅細路女咁，用力點頭：「好啊。」

好想好想，我同林林一齊坐喺彩虹橋上睇星星嘅背影，可以定格，成為我今生最靚嘅油畫。

我會一直，一直等你。