是咁的，照顧過我嘅護士死咗: 二百一十二、緣

起身又係時候返工。

我同阿連一齊搭巴士，佢喺度睇緊蘋果動新聞，我就滿腦子都係幅畫嘅構圖。

不過我今日其實放咗工都要去醫院攞藥，加上媽媽難得準時收工同我食住家飯，所以今晚未必真係完成到全部草圖。

順帶一提，今日攞藥唔關我啲新傷事，只係我本身脆骨症嘅定期覆診嚟。

「我見你琴晚成兩點先瞓咁滯，今日都仲咁精神嘅？」阿連問。





「又睇我last seen⋯⋯其實你係咪真係要轉基了？」

「你就轉基，咁啱見到咋。點呀，搞咩嚟呀？」

「無野呀。」

「無野？你照下鏡睇下自己個含春樣啦。」

最後我投降，將自己打算畫畫送畏林林嘅想法話咗佢知。





「我教精你啦，溝女嚟講呢最緊要就係睇有無緣嘅，無緣你畫到幾靚都無用。」

阿連好似講得幾有道理，我仲以為佢實係話溝女最緊要係錢㖭。

「咩緣呢連燈大師？」

「普通就港元，最好就美元。」

我望返出窗外面，費事理佢。