是咁的，照顧過我嘅護士死咗: 二百二十七、唔公平！

十八子跳上我張床，退到角落，抱胸，嬲爆爆咁。

「你無送過畫畀我！」

「仲好講，我畫過百合花想送畀你，係你走咗去收男朋友紮花之嘛！」

十八子一臉疑惑：「幾時嘅事呀？」

「畢業嗰日。」





「咁你而家送吖，你而家畫畀我吖。」

「唔制。做乜你好似個細路咁架，人地要乜你又要乜。」

十八子真係好似個發脾氣嘅小朋友咁用力拍打我張床：「我唔理呀！總之我都要！你唔公平，點可以掛住溝女唔理青梅竹馬架！」

難以理性溝通。

「好喇好喇，我畫完依幅就畫百合花畀你。」





十八子將下巴埋喺曲起嘅膝頭上，雙眼斜斜望住我，好似想人地領養自己嘅貓仔咁。

「真嘅？」

我點點頭。

十八子雪白嘅腳趾一緊，微微笑起嚟：「嘿嘿，我知薯片最錫我嘅。」