是咁的，照顧過我嘅護士死咗: 二百三十一、無呀！

十八子無抬頭望我，好專心咁洗碗。

「咪住先⋯⋯即係你咁耐以嚟都⋯⋯」

佢怕怕醜醜咁點頭。

「你以前⋯⋯唔會同我講架喎。」

所以我真心一直唔知，每次問佢做乜成日換畫佢都扯開話題。





「可能因為見到你同個靚女護士⋯⋯好似真係雙向交流緊咁，所以先想講多啲野你聽。」

十八子將過咗水嘅碗碟放好。

「我想你⋯⋯了解我多啲。」

佢望向我：「女人嘅直覺好準架，你兩個一定有啲野！我唔鍾意！」

我反佢白眼：「係我單方面對佢有啲野啫。單戀嚟架咋，唔係雙向架。我以前都鍾意過女神啦，又唔見你咁大反應？」





「咁女神擺到明對你無意思架嘛！」

我好似聽到弦外之音。

「即係以你女仔嘅角度，你覺得我同林林有啲火花？」

十八子嘟起嘴：「無呀！今生今世都無呀！」