是咁的，照顧過我嘅護士死咗: 二百六十、陽光與影

今日受咗德仔離世嘅打擊，再聽到媽媽自白嘅震撼，令我一時之間講唔出任何說話。

「你都知我地愛民邨幾邪架啦，年中喺度自殺嘅人都唔少。」

我諗起依度嘅鬼門傳說，的確好多人喺依幾棟井字型公屋入面自殺，上網一搵就有好多相關新聞。

「我諗我本身都會係其中一個。」

我曾經以為媽媽同我完全相反，無論身心都係一個堅強嘅女超人。





喺爭人街數嘅情況下打幾份工還錢再湊大我，我讀緊中學嗰陣從來無叫過我返兼職，等我有足夠時間讀書同休息。

喺窮嘅家庭入面，連休息時間都係零和遊戲。我休息咗，就意味住媽媽無得休息。

亦因為咁，我雖然受媽媽影響唔可以揀藝術而唔開心，但從來無嬲同憎過佢。

正因為我好清楚佢幾辛苦，所以即使放棄自己嘅興趣同愛好，即使有遺憾，都係心甘命抵。

睇返以前泛黃嘅相，媽媽後生嗰陣有少少林青霞嘅影子，絕對係個美人。（聽講我生成咁係似老豆wtf）





不過媽媽嘅面容早就因為多年嘅操勞而佈滿皺紋同滄桑嘅神色。

佢咬緊牙關咁為我賠上青春、時間、金錢、腰圍、美貌、健康同自由，將我養大成人。我以為佢內心毫無掙扎咁勇往直前，但原來只係佢無講畀我聽。

「陽光愈猛，影就愈深色。」