是咁的，照顧過我嘅護士死咗: 二百六十三、作為弱者

我屋企嘅傳統，向來都係只拜阿公阿婆，老豆連神主牌都無個，可想而知媽媽幾憎我老豆。

不過感動過後，仍然要面對生活。仲差五十萬，講緊廿年前嘅五十萬，唔係一筆小數目。

再加上我嘅病，檢查、入院同醫藥費嘅負擔亦比一般小朋友重好多。

媽媽除咗還錢仲要賺醫藥費同照顧我。

唯一好彩嘅就係結婚之後有間公屋住，如果當年要租外面屋，媽媽話一早帶埋我自殺死咗。





但無止境嘅還債地獄，亦令媽媽一次又一次情緒崩潰。

「每晚都喊住話自己捱唔住，但到咗第二朝又同自己講要捱落去。」

問題係，佢發現覺得捱唔住嘅日子愈嚟愈多。

就算返工都係被人嫌三嫌四，連倒個垃圾都被啲懶清高嘅家長冷言冷語：「女呀努力啲讀書呀，唔係第日好似佢咁倒垃圾架喇。」

每日面對嘅都係細個最驚嘅蛇蟲鼠蟻，掃街嗰陣連被車車爆嘅老鼠屍體都要處理。





有時包伙食嘅地方啲飯已經擺到臭咗，結果唯有捱餓繼續做。

歧視無處不在，見到一個污糟邋遢嘅女人，喺大街又好，餐廳又好，交通工具都好，都會受盡白眼。

人類會尋求比自己弱嘅獵物，提升自己無謂嘅優越感。

只要身上有無辦法掩飾嘅「異常」，就會成為獵物。

作為弱者，只能夠低頭忍受。