「我好明白只係我無能力,先至還唔清。亦係我對你唔住,所以如果要死,就一齊死。」

我幻想到,媽媽只差一步就跳落去嘅光景。

但我,仍然喺度。

「咁點解⋯你無跳到?」

媽媽諗返當日嘅情景,望住我。





「喺我準備跳嗰陣,你第一次叫我。」

媽媽抱住我,視線被心底湧上嚟嘅水氣搞到模模糊糊,眼前嘅井底唔再係鬼門。

或者話,佢眼前已經唔再係十幾層樓遠嘅地面。

眼中,只有我一個。

「⋯⋯嗚⋯⋯唔,媽。」





媽媽返咗轉頭,想好用力咁摟實我喊,但又怕整到我啲骨,唯有輕輕力咁摟住,淚水一粒粒滴濕我嘅頭髮。

「嗰刻,我就知,你的確係我永遠還唔清嘅債。」

但依筆債,我願意還到永遠。