是咁的，照顧過我嘅護士死咗: 二百七十一、打人嘅理由

行咗一輪，我同林林都係相對無言。

佢唔講，我亦唔敢問發生咩事。

林林話準備返屋企，保釋嘅錢同人情下次會還返畀我。

「我搭地鐵。」

「咁⋯⋯我送到你去地鐵站吖。」





我地兩個走落淺綠色嘅油麻地月台，大家都係綠色線，但佢返石硤尾，我去何文田，方向相反。

「好攰啊。」林林伸咗個懶腰，行到車尾方向，坐咗喺凳上面。

「往調景嶺列車即將到達⋯⋯」

「有車喇喎。」咁快有車都要坐？

林林笑一笑，向我拍拍旁邊嘅空位：「坐吖。」





我聽話咁坐埋去，個心卜卜卜卜咁跳得好快。

第一次⋯⋯同林林並排坐。記住依個感覺，返去改咗草圖並排坐嘅部分先。

「你唔問我，點解打大籮嘅？」

「我見你好似好嬲，唔敢問。」

「你係德仔嘅朋友，有權知道。」





林林無視閂門駛離月台嘅地鐵，開始將佢今日返工嘅事講畀我知。