是咁的，照顧過我嘅護士死咗: 二百八十三、後日談

「政府點會理你吖，哂氣啦。」阿連再一次發表偉論。

又一個尋常嘅返工日午飯時間，我身上嘅固定器已經拆咗，而幅畫亦完成得七七八八。

大籮最後真係被上層施壓而放棄追究責任，所以林林得以繼續做野。

依個半月入面，林林依舊好忙，而且好似忙過之前。

每次去覆診見到佢都係匆匆忙忙，可能因為德仔唔喺度，佢嘅工作量又大咗。





不過林林被人投訴黑面無笑容嘅日子就多咗，聽阿正講好耐無見過林林笑。

我雖然想約林林，但佢除咗返工以外嘅時間都去咗抗議，真係無哂空閒時間。

咁嘅情況下約佢一定食閉門羹，於是我就唔敢開口約佢，只夠膽每隔幾日同佢wtsapp傾下計。

而十八子呢，終於突破一個月唔分手嘅紀錄，仲同大雄一齊，我都好鄧佢開心。

十八子只要堅持到一樣野一個月以上，就代表嚟真。當年就係咁一直堅持做護士直到依家，咁睇嚟佢今次應該會同大雄拍長拖。





至於阿連，嗰晚識咗大家姐之後，好似對人有意思，當然大家姐懶得理佢，所以仲係單身，唯一唔同嘅係佢兩個格甩底愈嚟愈白，幾乎反光。