「無興趣吖嘛。」

「咁咩人先會有興趣讀護理?你估日日見屎尿血膿痰好過癮?你有無抿過自己以外嘅人啲屎?做一世都唔會發達,做錯野就會死人,仲要聽你地依啲外人講啲背脊落嘅說話,連屙尿食飯嘅時間都無,請問咩人先會立志做醫護?」

阿連見我有啲燥,開始收斂:「唔⋯⋯蠢人?」

或者,真係蠢人啦。

不過燥還燥,估唔到阿連竟然無再睇非洲新聞,而係睇多咗港聞。





雖然以偏概全,一碌尻打一船人係普遍大眾嘅本能,因為只要咁諗野個世界就簡單好多,個腦就唔需要真正思考,而阿連都係依種人。

但佢由只靠道聽途說就落判斷,到依家至少佢係睇咗相關新聞資訊先落判斷,已經算有進步。

「係喎,你幅畫畫成點呀?」佢見再講落去我實嬲,就唔再睇新聞,夾硬扯開話題。