是咁的，照顧過我嘅護士死咗: 三百零一、快啲斬纜啦！
「但會唔會係佢真心忙呢？」
十八子好似聽到小朋友話想快啲長大咁，眼中嘅笑意有懷念童心未泯嘅不忍。
因為我仲係咁天真，未知道殘酷現實嘅真相。
「話沖涼通常一沖就成個禮拜，你估真係沖涼咩！唔想覆你咋。話忙都係一樣。依兩招我用到爛哂喇，放棄罷啦。」
十八子繼續向林林散發莫名嘅敵意，極用力咁咬斷麵條。
「唔見你對我用過嘅？」
十八子擰開塊面唔望我：「你點同喎⋯⋯總之！」佢一野拍枱烏身向前：「佢對你無興趣架喇，快啲斬纜啦！」
「但佢無同我講過忙同要沖涼喎，只係無主動開話題之嘛。」我將十八子偏離主軸嘅思考方向糾正。
十八子手機一震，我見到「大雄」個名旁邊有個心心。佢解鎖手機認真咁睇訊息再回對方。