是咁的，照顧過我嘅護士死咗: 三百三十、兩個膊頭

參加白色運動嘅醫護人員會根據每一更嘅完結時間過嚟參與靜坐，所以示威人士好多都輪更咁嚟政總。

平均坐幾個鐘頭，佢地就會返去休息，第二日返完工再嚟。

「咁我地走先喇。」我同林林一齊離開，向黃醫師交代一聲。

「好，多謝你地嚟聲援呀。柳護士，你記得注意自己身體，唔好去得咁盡。」

「我知架喇。拜拜。」





我同林林一齊坐十一點幾嘅地鐵返去。

見列車駛入月台，我鼓起勇氣問佢：「不如⋯⋯我我我我我我我送埋你返去吖？」

林林點點頭：「好呀。」

好野！得咗！成功喇！

我同林林一齊上車，並排坐。





睇嚟我啲勇氣有啲用，食住個勢上⋯⋯可能表表表表表表表白都會成功都唔定。

林林望住我，好似有啲唔好意思咁問：「我⋯⋯可唔可以借你膊頭瞓？」

「得得得得得！」

林林由我左邊起身，坐去我右邊：「咁就算你一陣托住我額頭，都唔會整傷隻右手喇。」

「你⋯⋯好體貼⋯⋯」





「梗係啦，我都唔想你隻手又有咩事架嘛。」講完，佢就伏咗喺我右邊膊頭。

「你連兩個膊頭都被我破埋喇。」林林好似惡作劇成功嘅小朋友咁笑一笑，合埋雙眼。