是咁的，照顧過我嘅護士死咗: 三百四十八、吐血

而永遠都係咁慈祥，一直都係咁包容嘅嫲嫲，嗰日竟然全身散發好似獅子望向獵物嘅危險氣息。

睇嚟林林動真氣嗰陣嘅氣場就係遺傳咗佢嫲嫲。

「依啲⋯⋯到底係咩嚟！咳咳！」

第一次聽到嫲嫲嘅咆哮，伴隨咳嗽。

「喂死老野！你咁惡做咩呀？」





林林擋住大家姐：「唔好咁啦，我嫲嫲嚟架！」

「柳穎林！咳咳咳！我問多你一次！依啲係咩嚟架？」

「嫲嫲你冷靜啲先⋯⋯」

「咩嚟？冰呀！high野係咪要攞牌呀？」

嫲嫲完全無視大家姐嘅反擊，尖銳嘅目光由始至終都釘住自己個孫女。





「係，咳咳！咩⋯⋯嚟？」

林林耷低頭。

「係⋯⋯冰毒⋯⋯」

咳。

重重嘅咳嗽聲，面上被噴濕，鼻腔傳入鐵腥嘅味道。





林林面上綻放點點紅花。

嫲嫲吐血。

林林同大家姐嘅大腦一時之間全部被紅血染白。

嫲嫲雙腳一軟，幾乎要無力咁跌倒。

大家姐比林林嘅反應更快，搶前一步扶住嘴角流出血絲嘅嫲嫲。

「嫲⋯⋯嫲⋯⋯」

「叫白車呀林林！」