是咁的，照顧過我嘅護士死咗: 三百六十一、半步

我行前半步。

我想主動，勇敢咁拉近我地之間嘅距離。

心跳到好似玩緊樓機咁，估唔到行前一步都有離心力。

大腦湧上中學嗰陣表白嘅畫面，女神厭惡嘅表情仲好似近在眼前咁。

恐懼嘅程度就好似睇緊隨時會跳隻鬼出嚟嘅恐怖片。





用力呑一啖口水。

同林林嘅距離只差半步。

我踏多半步，就可以摟實佢。

但我好驚佢會呆咗，好驚佢會嚇親，更加驚佢會推開我。

我應該同佢保持一碗小食嘅距離先啱，直到依家我都仲未同佢食過一餐正式嘅飯。咁嘅關係，我根本就唔應該摟人。





成個手心都係汗珠。

我好驚摟咗落去，就連朋友都無得做。

我只係一個脆骨症病人，同我一齊唔會有幸福嘅未來。

林林仲未察覺到我同佢只差半步就可以相擁，雙眼仍然望住無星嘅天幕。

「無星⋯⋯我連想話嫲嫲變成咗星星守護我都唔得㖭。」





林林無可奈何，又有啲自嘲咁微笑。

蒼白嘅面容、憔悴嘅神態、無奈嘅微笑。

太令人心痛。

望住林林依個表情，所有恐懼嘅理由，往日表白失敗嘅回憶，連同理性一齊崩潰。

感性大隊由内心全面進軍我嘅身體，喺未經大腦發出指令之前，已經控制咗我對腳。

我終於，向前邁出咗最後半步。