是咁的，照顧過我嘅護士死咗: 三百六十八、猝死

直到最後一間，都唔見林林嘅身影。不過房入面有阿正喺度為病人量血壓。

我稍為走近。

喺我隔離病床上嘅女病人，係以前被林林照顧過嘅單程證大媽，佢睇緊報紙，投訴緊繁體字睇死人，問有無人民日報。

阿正一路量血壓，一路用力索鼻水，不時伸手用力擦對眼。

「阿正？」





阿正聽到我叫佢，轉頭過嚟，嘴唇微微震動。

我嘅眉毛不受控咁跳咗下。

阿正眼紅紅咁索鼻水，寫埋病人嘅血壓記錄就行過嚟。

「野吖嘛？感冒呀？」

「無事⋯⋯做咩？」





「唔好意思呀阻你做野。我想問林林喺邊呀？我搵極都唔見佢，我有禮物要送畀佢呀。」

聽到「林林」兩個字同時，阿正嘅淚水亦湧咗出嚟。

心跳加速。

林林揞住心口嘅畫面佔據我嘅視線。

「你搵柳姑娘？你無睇報紙咩？佢死咗啦，猝死吖嘛。」睇緊報紙嘅大媽插嘴。





望向阿正，佢谷到塊面紅哂，緊閉雙唇忍住唔好喊出聲，但都有啲聲喺嘴角穿出嚟。

「阿正⋯⋯佢⋯⋯講真嘅？」

阿正點頭。

我嘅靈魂離開咗身體。