是咁的，照顧過我嘅護士死咗: 三百八十三、意見分歧

「唔可以！」媽媽極力反對。

「但係⋯⋯」

「唔使但係！出面咁多人好容易有碰撞，你太容易受傷，我點都唔會畀架喇。」

我嘗試說服媽媽：「咁如果我有方法令其他人唔會撞到我呢？」

「點會有咁嘅方法呀？仲有到時咁多人你點樣確保人地唔會唔小心撞到你先？你一撞就散架喇！」





媽媽行去電視旁邊，指住畫面上嘅人群：「你睇下多人到？仔呀，依啲出街遊行抗議示威嘅野，咪由得其他人做囉。反正多你一個唔多少你一個唔少，你唔需要去架。」

「如果每個喺屋企嘅人都覺得自己可有可無唔參加，咁就唔會聚集到足夠嘅力量逼政府面對問題架喇。」

電視上嘅人打開手機燈，舉高隨住音樂擺動。



「夠人架喇，你見唔見到呀？已經夠多人喇，所以你唔需要去架！」





「仲未夠呀，當年雨傘運動有成一百二十萬人，結果政府都係無變過。今次白色運動得九十萬人，政府係唔會真心處理架。家下推出嚟啲方案同談判都係安撫大眾情緒架咋。削單程證又被建制派否決咗，增加醫療撥款又否決，需要更加多人企出嚟，佢地先會正視問題架。」

有立法會議員話，香港有八百萬人口，依家上街嘅都唔夠一百萬，證明覺得醫療系統唔需要改革嘅人仍然佔大多數。

「我地係民主嘅社會，會尊重大多數香港人嘅意見。」啱啱好新聞又播到佢尻噏。

「見到啦媽媽？佢地仲覺得未夠多人，既然係咁我地就應該更加多人企出嚟，話畀班高官聽，香港真係頂唔順，真係好有問題。」

「我都知有問題啊，咁咪等其他人解決囉。你唔係唔知自己咩體質，出面又混亂，我唔想無咗個仔呀！」





我走入房，將我未完成嘅大型掛牌拎出嚟，大概同我個人嘅闊度差唔多。

掛牌上大大隻字寫住「注意！我有脆骨症！」，不過就未上色。

「我會掛住依塊牌出去，咁就可以令其他人留意到我。媽，我真係好想出一分力，你再老啲都要入醫院，係人都會老都會病，我唔想你日後入到醫院因為人手唔夠病人太多搞到你失救，我亦唔想啲醫生護士為咗照顧病人做到死啊！」

「但我唔想你出去示威就死啊！你明唔明呀！阿媽我係因為你先捱到依家架咋，無咗你我點算好呀？」

我同媽媽好少嘈交，估唔到一嘈就嘈到咁金。