是咁的，照顧過我嘅護士死咗: 四百一十三、阿連相救

就喺警棍要粉碎我頭骨嗰下，一個巨大嘅身影穿出白霧跳出嚟，將警察推開。

「阿連！」

「阿金！快啲走！」阿連擋喺我前面，啱啱被推跌嘅警察重新企起身，左右扭一扭自己條頸。

警察提起警棍揮向阿連，佢避開之後同佢搏鬥，我喺地上繼續狼狽咁逃走，催淚白煙開始消散，我仲可以清楚咁見到阿連。

佢騎喺警察上面，明顯佔上風，但隨住氣體散去，幾個防暴警察走向被騎住嘅同袍將阿連推倒，幾枝警棍喺阿連頭上狂毆。





「停手呀！」我向佢地大叫。

「唔好理我！走呀！」阿連頭破血流，被幾個警察壓住，將雙手扭向身後，被鎖上手銬。

「走呀！！！！」阿連雙眼被血水掩蓋令佢打開唔到，再被一個防暴警察用膝頭壓住條頸。

阿連個頭對住我，橫向咁被壓喺地上。

「停⋯⋯停手⋯⋯」咁會死人架。





我企咗起身，邁步向阿連。

阿連幾經辛苦終於掙開眼睛，已經唔理啲血澀眼，勉強望住我。

佢用發唔到聲嘅口做出口形：「走⋯⋯呀⋯⋯」