是咁的，照顧過我嘅護士死咗: 四百一十五、彩虹橋表白（網路結局）

當我再次有返意識嗰陣，我發現自己全身輕飄飄，企咗喺南山邨嘅彩虹橋旁邊。

依刻，成個世界只得我一個人。

我最後嘅記憶，停留喺警方放催淚彈之後，我被人壓向地表嘅一瞬間。

如無意外，我應該已經死咗。唔知十八子最後有無事呢？

希望佢可以醒返，收到我補送畀佢嘅百合花。





我想嘗試離開彩虹橋嘅平台，但我發現自己無辦法走得到，每次走嗰陣都會返咗去原地。

咁即係我無辦法睇到阿連最後點，十八子最後有無事，香港有無變好，只能夠一直留喺依個地方。

「喂，我份生日禮物呢？」

背後有人叫我。

頓時，一大泡眼淚湧咗上眼眶，熟悉嘅女聲。





啊⋯⋯

依把聲⋯⋯

我好掛住你⋯⋯

我唔敢轉身，深怕轉身會見到一個人都無，好怕轉身就會夢醒。

右手被一陣好似羽毛咁輕嘅觸感包圍：「依家唔驚整碎你啲骨喇。」





我忍住眼淚：「如果我轉身⋯⋯你會唔會消失架？」

「唔會呀，擰過嚟啦。」

我鼓起勇氣，邁步轉身，見到一個模糊又清晰嘅白影，明明唔應該睇到個樣，偏偏又睇得到佢係林林。

「睇咗我封⋯⋯情信未？」林林有啲怕醜，唔敢望我。

「睇咗喇。」

「咁⋯⋯我有無生日禮物？」

希望收到你的畫作為我的生日禮物。

「但我依家拎唔到幅畫畀你喎。」





「喂呀！」一個粉拳打落嚟：「我唔係講依樣呀！」

但我更希望收到你答應我的吻作為生日禮物，希望你不會嫌棄我這個大陸女生的情信。

我無出聲，直接將林林拉入懷中，用雙唇送上一份遲咗少少嘅生日禮物，答應佢嘅心意。

我地相視而笑，過咗一陣，我終於鼓起勇氣。

「我愛你，林林。」

終於，我成功將心意表白。

林林向我甜笑，摟到我好實：「我都係。」





人生第一次，成功表白。

我地嘅眼中只有對方。

「你有幾愛我？」

「愛到死咗都要表白，愛到成個心都淨係得你。」

林林有啲懷疑咁打量我：「前面我信，後面我唔信喎。」

我伸出手放去左胸，扮拎咗個心出嚟，手指環成一圈，之後扮心跳咁將啲手指一收一放。

「拿，依個係我個心，你望下入面有乜野。」

林林望向我環成一圈，好似揸住一條透明圓柱體嘅手指。





「呃人，乜都無嘅。」

「咁呢？」

我將扮成心臟嘅手擺喺眼睛前面，林林經過我手指環成嘅圈，見到我嘅瞳孔，入面映照住林林個樣。

「又真係成個心淨係得我喎。」

「都話無呃你架啦。」

林林好滿意咁微笑：「非常好。嗱，我都無呃你架。」佢指一指上方。

南山邨上空嘅夜幕，終於出現星光。





「係咪好靚呀？」

「嗯。」

「嚟吖。」

林林拉住我隻手，走上彩虹橋上坐低，我地兩個手拖手，一齊抬頭欣賞天上壯觀嘅星空。

如同當日我畫嘅畫一樣，我同林林嘅時間，停格喺依一個幸福嘅刹那之間。



網絡結局完

購買電子書︰https://play.google.com/store/books/author?id=%E5%81%9A%E9%87%91%E5%BA%B8%E7%9A%84%E7%94%B7%E4%BA%BA

購買實體書︰https://www.enrichculture.com/products/9789887826675

電子書及實體書含真實結局