愛回家之傷心速遞？！: 第十章 備受打擊的商良 

這個星期日萬里無雲，溫度宜人，是個休息的好日子，可龍力蓮有種不安的感覺，只因熊尚善一早就霸占着她家客廳的沙發。接近十點的時候，商良登門拜訪，一臉憔悴的造型讓龍力蓮恍然大悟熊尚善的來意——她顯然又是來看熱鬧的。


「蓮蓮！點解你要咁做？」商良直接來了個讓龍力蓮無法對接上的開場白，「我都已經登報解釋咗，之前嘅嘢全部都係我自己發酒癲，點解你仲係唔肯原諒我？」


「Jacky你冷靜啲，熊尚善！你快啲同我解釋係咩一回事！」看着商良淚流滿面的樣子，龍力蓮不得不向熊尚善求助，好了解今日上演的劇本究竟是什麼。


「哦？你唔知網上流傳緊一條聲稱係商心小棧集團贊助嘅教學短片咩？佢嗰集團呢排幾忙吖！個招聘熱線被打爆咁滯，個個想飛上枝頭變鳳凰嘅女仔都爭住想入去做，睇下可唔可以吸引到個CEO，搖身一變成為CEO夫人，真係天真！」熊尚善用諷刺的語氣說出最後一段話。






「蓮蓮，我真係知錯㗎啦！我以後飲醉酒都唔會亂講嘢！唔係！我由呢一刻開始就戒酒，以後都唔會再有機會講錯嘢，好唔好？你唔好唔接我電話，唔聽我解釋，仲用埋啲咁嘅方法來……」


「停！」龍力蓮不得不打斷對方，「首先，你去咗葡萄牙成個月，你一次都冇打過畀我，何來我唔聽你電話嘅講法？第二，我冇估錯，你應該係啱啱先翻到香港就直接由機場過來我呢度，而我而家仲企喺度聽你講緊啲我都唔知係乜嘢嘅解釋。最後，條片究竟係啲乜嘢？」


「你哋財務部出咗個通告，share咗我啱啱講嘅片，叫人跟住來學……算啦，我畀你睇下你就明喇！」熊尚善打開手機，三兩下就把龍力蓮想要知道的信息找出來。觀看完後，龍力蓮哭笑不得，終於明白這場鬧劇是怎麼一回事。她打開手機檢查，發現「商良」這個名字被拉入聯絡人黑名單，證實了她的一系列想法。






「嗱，我冇估錯嘅話，Mandy喺我部電話度block咗你，所以我完全冇收過你嘅電話。」龍力蓮當着商良的面把手機裏關於他的封鎖解掉，「至於個通告應該係爸爸做嘅，只有佢先至可以越過我用財務部嘅名義發呢啲嘢。」


「仲唔明啊？」熊尚善拍了拍傻傻地站在客廳中央的商良，「Linda唔會為呢啲小事嫐咗你，但佢爸爸就唔同喇！今鋪擺明係大龍生玩緊你，要教訓你唔好亂講嘢啊！『我要同蓮蓮結婚！』」熊尚善模仿起商良當日喝醉酒後的表現，「係得你先夠膽喺大庭廣眾講埋啲咁嘅嘢！想班記者唔亂寫都唔得啦！」


「好喇！唔好再打擊佢喇！爸爸今次確實好揼本咁來玩佢，條片嘅女演員唔係咁容易請到。之前我哋新威龍廣場裝修後重新開幕想請佢來做嘉賓，但佢啲期勁滿，最終都傾唔成事。」龍力蓮對此感到遺憾，因為她挺欣賞這位女演員。






「佢幾犀利㗎！我上次睇潔大導拍嗰部『五十次豈有此理』就係搵佢做女主角，聽講唔使點NG，真心佩服佢！」看完戲的熊尚善開始和龍力蓮聊起八卦，完全忘記被她倆晾在一邊的商良，而明白前因後果的商良也終於冷靜下來。


與兩人一起長大的商良很清楚龍敢威是個怎樣的人，畢竟他親自領教了對方好幾次的手段。這回又栽在對方手上，他只能哭笑不得並自認倒霉，而他也再次意識到想得到龍力蓮的芳心，龍敢威會是個如何巨大的障礙。