灰姑娘計劃Project Cinderella: 第八幕
第八幕
時間：星期六中午
地點：沙田屋村、蘇豪區餐廳
人物：Terence、Ming爺、Tracy
場景：到沙田接了灰姑娘後到餐廳用膳。
「去灰姑娘Tracy屋企要差唔多五個字，但今日係星期六，少啲車，我估可以早啲啲到，你哋都知女人出門要好耐時間，所以我要盡快去到，預多啲時間畀佢將呢三樣貴到飛起嘅道具著上身，轉頭見。」
Terence由尖沙咀出發，用在頭文字D、灣岸和首都高速練成的駕駛技術往沙田飛馳。
「A Dream Is A Wish Your Heart Makes……」Terence電話的鈴聲響起。
「喂，Terence，你而家係咪去緊沙田喇？」電話裡頭傳來Ming爺的聲音。
「係呀，極速飛緊入去，應該啲時間啱啱好。」
「咁就得喇，餐廳嗰面我佈置緊，都差唔多搞掂，轉頭見。」
掛上電話後，Terence繼續在隧道內疾走。
「好喇，只係用咗四個字左右，而家係十一點二過啲，我已經到咗灰姑娘屋企樓下，好在啱啱Call定佢落嚟，而家已經見到佢企喺度等緊。」
「嘩……呢架車你㗎？好靚呀。」看到Terence從車上下來，Tracy的第一個反應並不離奇：「你今日著得咁型嘅，我好似好寒酸咁……」Tracy頓時顯得有點自悲。
Terence見狀，立即安慰她道：「傻喇，點會呢，你本身都已經好靚，無咩問題，不過我一早已經準備咗啲禮物送畀你，令你更加Perfect，你等等。」
Terence從車上取出三寶交給Tracy，並說：「嗱，小小意思，難得今日你肯同我出街，呢啲見面禮你收咗佢喇，睇吓鍾唔鍾意。」
Tracy打開首飾包裝一看，差點把手上的東西都掉到地上，深呼吸回過神後，對Terence說：「呢啲嘢應該唔平喇，咁貴重嘅嘢我點可以收，你拎返佢送畀第二個喇。」
「我送咗出去嘅嘢係唔會收返，而且佢哋都好襯你，你著上身試吓先喇。」
「但係……」
「唔好但係喇，快啲返屋企換咗佢喇，我喺度等你。」
「不過……」
「不咩過呀，你同得我一齊，我一定會對你好，You Are My Princess。」
Tracy眼見Terence盛情難卻，再拒絕也不好意思，只好回家換上Terence為她準備的衣服。
「估唔到叫佢換衫都搞咗十分鐘，而家搭四，女人出門口有排整，唔知趕唔趕得切十二半去到餐廳呢？可能一陣又要亡命飛車，大家想睇佢嚇到花容失色就等吓喇。」
十一點四十分，Tracy再次出現在Terence眼前，而且已經換上了Terence為她準備的三寶，妝容也由剛才青春活潑的淡妝換上了比較隆重的濃妝，時間顯然比Terence預計的早了很多。
「嘩嘩嘩！你好靚，我以為你要用好耐時間添，點知你咁快手嘅。」Terence紳士地幫Tracy開了車門。
「係呀，唔想你等我咁耐麻，本身可以仲快啲，不過條裙同啲首飾複雜得滯，搞咗我一輪先得。」
「哦……哈哈，最緊要靚，我等得嘅，你化妝都好快，我仲諗住要耐啲。」
「我有兼職做新娘化妝嘅嘛，所以化妝我好快手嘅，咁我哋而家去邊呀？」
「Well……」由於時間被打亂，Terence有點不知所措：「我哋去兜吓風先？我好想多啲人見到我車個咁靚嘅女仔，等啲人羨慕吓都好。」Terence按下開篷鍵，車頂緩緩收下變成開篷超跑。
「痴線喇，邊有人會羨慕嘅，我咁普通。」Tracy今天笑得特別燦爛，格外迷人。
「點會普通，連我都畀你吸引到喎！」
「講大話喇你，喺度氹我。」
駕著車一邊漫無目的的等時間過，一邊和Tracy聊天，Terence竟然閃過一個念頭：「希望以後都係咁。」
「你揸車好穩，我完全唔會暈車浪。」Tracy讚賞Terence的駕車技巧：「我見你揸呢啲超跑，仲以為你會揸得好快，點知係咁安全。」
「因為我要拖時間所以先咁慢喳。」Terence心想，但口卻回答：「當然喇，我一向安全至上，我都唔鍾意飛車嘅，再加上我要揸慢啲，等多啲人見到你同我一齊，咁先會有更多人羨慕我。」
「又吹水。」但笑容從未在Tracy臉上消失。
亂晃了半小時後，Terence開始向蘇豪區出發：「時間差唔多，我哋去食飯喇。」
十二時三十分，他們準時到達蘇豪區Ming爺家開的餐廳，一切如計劃一樣，除了Terence和Tracy，並無其他客人，餐廳由Terence包起了。
「點解無其他人嘅？係咪未開門？不如我哋去第二度食喇，呢度好似好貴咁。」
「傻豬嚟嘅，無人係正常，因為我包起咗，唔駛同我客氣，呢餐我請。」
兩人經侍應帶到一早預備好的拍攝最佳位置坐下，遞上了Menu，簡單介紹了一日限定的午餐菜單，並問要什麼酒，但Terence拒絕了，待他們點完餐後便離開。Ming爺在遠處向Terence做了一個Okay手勢，一切根據劇本進行得很順利。
「其實啱啱個侍應介紹個Menu你聽唔聽得明？」Tracy小聲問。
「放心喎，我讀書無你咁叻啫，但我都仲聽得明嘅。」
「但其實我唔明，我都唔知叫咗啲咩食，我跟你叫喳……」
「你撚化我咩，你點會唔明，啱啱我叫咗呢間餐廳最出名嘅牛歡喜同牛鞭，每日限供應嘅，我以為你都咁識揀。呢間餐廳嘅牛歡喜出名夠味同入口即溶，專用處女牛女嘅歡喜整成，係名菜嚟；至於牛鞭呢，就出名又長又粗，味濃又有咬口，係人間極品，好多明星名人都專登嚟幫襯。呢兩道餸食完包你返唔到轉頭。」Terence說著說著，口水已經漏了出來，連忙用毛巾抹掉，而Tracy則嚇得面青口唇白，喝了兩口水定驚。
「我可唔可以轉其他嘢？」
「你唔鍾意食？」
「我唔夠膽食呢啲……」
「傻喇，試完就夠膽，真心正，信我。」
「但我都係想食返啲普通哦嘅嘢。」
「咁即係唔信我喇。」Terence裝出一幅十分失落的表情，接著說：「我仲以為揾到個知音，點知係我會錯意，唔緊要喇，你轉其他嘢食喇。」
Tracy看到Terence的表情，有點內疚，還在猶疑轉不轉其他食物，此時，侍應端來了兩碗餐湯和一盤麵包，而Tracy最後也沒有開口轉其他食物。
經過忐忑的十數分鐘等待，侍應端上了兩碟牛扒。
「點解會係牛扒嚟嘅？」
「當然係牛扒喇，啱啱我哋叫嘅，唔係會係咩？」
「你又話係牛歡喜同牛鞭……」
「癡線喇，我同你講笑之嚇，咁核突嘅嘢我點會食。」
「咦，衰人，啱啱嚇死我喇，以為我真係要食嗰啲嘢。」
「你估低俗喜劇咩，估唔到你咁都信。」
「咁你講到咁真，我點知啫。」
「好喇，唔好喊，快啲食嘢先喇，呢個牛扒好好味嘅，米芝蓮推薦嚟。」
Tracy切了一小塊放進口試食後，臉部肌肉不受控地郁動，就像美食動畫中食過主角烹調的食物後的反應一樣，當Tracy想吃第二口時，Terence阻止了她。
「你試吓加埋呢個喜馬拉雅山岩鹽再食，會仲正。」Terence伸手替Tracy磨了些少岩鹽。
「嘩！真係呀，本身都已經好味，加埋呢個鹽仲正，你果然識食，無介紹錯。」
「今次呢啖你試吓點呢個特製醬汁，又係另一個感覺嚟。」
「等我試吓先，」Tracy切了一小塊牛扒並蘸了一下醬汁，吃過後掩不住美食帶來的喜悅，興奮的說：「真係好好味呀，呢個醬好清淡但又有果味，好清新，將啲牛嘅油膩感完全帶走哂，好正。」
「哈哈，唔知仲以為你拍緊飲食節目，慢慢食唔駛急，唔夠再叫多份。」
正當Tracy沉浸於美食當中之際，Terence召來了侍應並在他耳邊說了數句悄悄話，然後便起身跟著侍應離開，而Tracy未有多加理會。
「點呀，一陣個表演準備好未？」Terence心急如焚的問。
「我辦事，你放心，Live Band已經準備好，USB都搞掂，一陣你咪嘴咪好啲唔好穿煲就得。」Ming爺回答。
「你拉我定喇，我練咗好耐，一定無問題。」
「係就最好喇，揾Eason錄呢首歌唔易嘅，一定要成功呀。」
數分鐘後，餐廳內響起了悠和的音樂，台上的布幕徐徐拉開，一隊Live Band出現了，而其中的主唱更是Terence！
「Tracy，希望你鍾意以下落嚟我為你準備嘅呢隻歌，A Dream Is A Wish Your Heart Makes。」
Tracy放下了刀叉，專心欣賞Terence的表現，Terence之所以選這首歌，是要配合這個計劃的主題，當然Tracy當時並沒有想得這麼深入透徹，只是覺得眼前這個男孩很貼心、很幽默、很有情調、同時又很不真實。
「啪啪啪啪」縱使只得一人的拍掌聲，但還是很熱烈。
「估唔到你唱歌都幾掂喎，真係睇唔出。」
「我仲有好多嘢你係睇唔出嘅，呢首歌我係特登為咗今日練嘅，無令你耳朵流產我就當贏咗嘅喇。」
表演過後，他們繼續用膳，Live Band繼續演奏悠和的音樂，而上甜品前，Terence又再離席。
「甜品整成點？」Terence在廚房小聲問。
「已經整得七七八八，差少少裝飾，一陣你拎出去當係你親手整嘅就得。」Ming爺拍著Terence的膊頭說。
突然整間餐廳的燈全熄了，窗簾也不知何時被拉上，整間餐廳伸手不見五指，但Tracy並沒有驚慌，因為她知道這一定是Terence的鬼主意。
果不其然，Terence從廚房推著手推車出來，手推車上放著正燃燒的甜品，效果異常驚艷，令Tracy看得如痴如醉。
「你試吓我嘅手勢同心意。」Terence把甜品放在Tracy面前。
「你親手整嘅？」
Terence點了點頭，用期待的眼神迎接Tracy的食評。
「你好叻呀！一定好好味，我試吓先。」Tracy舀了一匙，合上眼細心品嚐。
「點呀？」
「真係好好食，肥我都唔理，食咗先講。」
「放心，唔會好肥，我用低脂食材整嘅，放心食。」
「真係㗎？你好細心呀。」
從Tracy的言行舉止、神情動作、臉部微表情等各方面來看，Terence已經深深俘虜了她的心，這代表從上午到中午的作戰目前為止是成功的。