我係個電台DJ，每晚都做個無咩人聽嘅節目: (五) 星巴克的女孩 (一)

「好啦，而家正式聽第一個電話。」

「喂，你好，阿芝係咪啊？」

「太子你好。」一把很悅耳的聲音傳到我耳中。
 
「你今年十七歲，想講下你屋企問題係咪？」

「係....」 





「好，你講下啦。」

「講下我屋企背景先啦。三年前我爸爸媽媽就離咗婚，個官將我判咗俾我媽媽。

我媽媽一路都對我幾好，直至舊年佢嫁第二次。

我後父對佢的確好好，但係對我就好差，成日都打壓我。」

「點打壓啊？」我問。





「要我做曬成屋家務，又成日借啲意叫我阿媽剋扣我嘅零用錢。

明明佢間屋都有間房，但就係都要我瞓廳。

基本上你諗得出而冇犯法嘅，佢都做過...」

「咁你媽媽冇出聲？」

不要覺得我這問題很無謂，要是她媽媽有幫助她，她便不會這樣。 明知故問是成為DJ重要的技能之一，用以引導他們到下一個話題。





這問題真正的意思，是：「為什麼你媽媽沒有幫助你？」

「我阿媽唔知點解變得好怕事，佢好似好驚我後父咁，成日叫我多一事不如少一事。

有好多次我想反抗，我好想番去我爸爸到，但係都被我媽媽制止住。」

「你同你爸爸關係點？」

「佢都好錫我，只係因為收入冇咁高所以法庭先冇將我判俾佢。」

「可唔可以講下你父母點解會分開？」

「佢地成日嗌交，應該都係性格不合。

我都唔知點解我阿媽會變成咁..」 或許她還年輕，不明白太多成年人的心態。





她的媽媽應該不太希望再次離開那男人，對她而言，那男人就是她和阿芝的靠山。

縱使她的工資有多高，還來不及依靠一個男人來得輕鬆。

況且她還帶著阿芝。

「啦，阿芝，我想你明白，你媽媽唔係唔錫你，我相信佢係有苦衷嘅。」

「有咩唔可以同我講？我幫唔到佢咩？」

「你而家最需要嘅就係讀好啲書，將來搵份好工。」

當然，這不應該是人長大後的出路指標，但是金錢或許是解決她們困難的方法。





縱使我從不認同人應追求金錢，但這就是生活的無奈。

「我而家都有做下PartTime，每星期六就會去希慎嘅StarBuck打工。」

「你而家應該要準備DSE架喎？」

「平時有6日俾我溫啊嘛，夠架啦。」

難得這女孩還抱著那麼樂觀的心情，真是難得。「或者你而家覺得係好難過，但係記住唔好放棄，我希望你大個之後可以記住我呢番說話，無論點都好，都唔好怪你媽媽今日所做嘅事。」

「噢..知道。」她似懂非懂的回應了我。

阿芝掛了線之後，我仰天長嘆了一口氣。

家庭的問題..旁人真的愛莫能助。





希望她真的能夠捱得過這一段難艱，不論為了自己還是她的母親。

「喂，你好..」一首歌的時間過後，又是一個新聽眾打來的電話，又是一段新的故事。