【懸疑】《珍珠奶茶殺人事件》: ——第五章：後患——
「嘟嘟嘟嘟......特別新聞報告。」
客人稀少的茶餐廳裡，電視播放著女主持嚴肅的臉。
「一名十歲既女孩，被發現猝死於高級琴行。經初步調查，懷疑係服藥過多致死，而受害人正正係香港首富李加鼎既千金，李超蓮。」
「嘩，新聞過左幾個鐘先播，有冇慢啲呀？天都黑喇。」喪堅托頭瞄著屏幕道。
阿邪一邊把碟上的星州炒米爬進嘴裡，一邊興奮說：「不過聽你地講完件事，頭先真係驚險萬分喎，最衰我無機會參與啦，哈哈。」
「唔該你唔好噴口水！」眼鏡娘甚是不滿。
「各位觀眾，知唔知我今日幾緊張呀，我到而家都仲好驚啊～」妖女露出半邊乳溝，用手機開著直播。
我默默地呷一口茶餐廳的熱咖啡，想起剛才發生的一切，不禁搖搖頭。
錯漏百出的犯案程序，說不定已經令人發現我們是行兇者。
唉，這次可謂千年道行一朝喪。
「喂喂，電視果邊直播緊李氏家族既回應呀。」眼鏡娘指向電視屏幕。
我抬頭一看，只見一個文質彬彬，戴著圓框眼鏡的男子，映在電視裡。
他的眼神懷著裘裘怒火，口齒微微抖動，好像隨時要爆出一堆髒話似的。
「係李加鼎個大仔，Freeyon。」眼鏡娘說。
「嘻嘻，佢個樣好似好嬲，好正呀......」阿邪嘴角滿是一條條金黃的炒米。
「聽下佢講咩。」我說。
Freeyon握緊拳頭，目望鏡頭忿忿開腔：
「我地發現超蓮既血壓藥少左好多，所以一定有人陷害佢，迫佢食哂啲藥。老豆派我幫手負責呢一次調查，真相一定好快水落石出......殺人兇手，我知你睇緊電視直播架，你地最好小心啲。」
他說「你們」......
不安的預感仿佛千萬條蠕蟲，侵襲著身體髮膚。
「既然唔可以再扮係意外而死，唯有希望佢地查唔出係我地啦。」喪堅一口把整杯凍奶茶喝光。
「好彩當時Paddy反應夠快咋～」妖女完成了直播，向我拋拋眉眼：「如果你唔攞走啲藥，佢地既調查方向就會轉向「點解超蓮體內既乙型阻斷劑含量咁高」，到時候肯定好快發現係珍珠奶茶惹既禍。」
「唉，不過都幫唔到幾多。」我瞥了瞥喪堅：「你最好剪一剪鬍鬚，染翻黑個頭。雖然我地係用假身份做保鏢，但你呢副尊容好易比人認得出。」
「得啦，驚鬼咩，從來只有我殺人咋嘛。」喪堅扯高氣揚道。
唉。
有時候，我覺得他比阿邪更加白癡。
「唔好諗果啲無聊野住啦，我地係時候收數喇嘿嘿嘿。」
「係喎，一億呀！」眼鏡妹被阿邪提一提醒，頓時雀躍起來。
「只要有一億，我就可以瘋狂買化妝品喇。」妖女眼睛發閃。
「我可以買多幾十把步槍，瘋狂打劫呀。」喪堅笑摸著亂蓬蓬的鬍子。
「我可以一次過約哂所有PTBF，迫佢地玩人形蜈蚣......」阿邪怔怔的遐想。
眾人心花怒放，我還是淡淡的喝著咖啡。妖女見我沒太大反應，靠近身子問我：
「係喇Paddy，你諗住點洗呢一億？」
「我啊...」
一億對我而言，有甚麼用嗎？
除了供樓，和為久臥於床的她支付醫療費用之外，我從未想過有其餘的用途。
不過，有錢便是萬能，這是我一貫的立場。
空想時，手機突然震動。我一看，只見老王傳了段信息給我。
細閱以後，我以犯愁的眼色望向大家：「唔好咁開心住。」
「咩事？」喪堅問。
「老王send左訊息比我，話委託人懷疑想反悔唔比錢。」
「下！邊有得咁架？」他大力砸打枱面，飲品頓時打翻。
「係咪個老野想中飽私囊咋？」眼鏡娘不悅。
「你估個個似你咁咩。」妖女回她一句。
「我邊有啊？」
「係人都知你貪錢貪到傻啦。」
「你講咩啊你！」
「唔好嘈......」就連阿邪也正經過來：「Paddy，老王有無講係咩原因？」
「無，佢只係叫我地快啲去車房地庫搵佢傾傾。」
「咁仲等咩...？行啦。」
夜幕低垂，我們迅即趕到大圍的車房，盡快找老王問個究竟。
可是甫走到樓梯口，濃郁的燒焦味從地庫湧至，感覺是燒焊而成的敗壞臭味。
帶頭的我，下意息地放緩腳步，掩蓋鼻子。
「咩事啊下面？咁臭既？」妖女問。
「我平日賴屎都無咁臭...」阿邪皺皺鼻頭。
「老王！」我厲聲疾呼：「你係咪喺下面啊？」
無人回應。
直覺告訴我，發生大事了。
我手肘掩藏鼻孔，不等其餘三人決定直衝下去。
嗵嗵嗵嗵嗵......
下去以後，不見一人。
濃烈的味道，卻是在布簾後傳出。
我嚥了卡在喉中的吐沫，姍姍的過去掀開布簾。
哧————
刺激眼球的腥黑畫面就在眼底下，一個燒至溶爛焦黑，腐肉四散的屍體躺於沙發前。
屍體的面部也燒得焦爛，單憑肉眼根本分辨不出是誰。但是從屍身大小，可以斷定是個老人家。
它的右臂前端部份，手指頭通通斬掉，只殘留著一隻玉翠戒指。
而它燻黑的左手，更握著一杯「獅子堂」的珍珠奶茶。
我萬般無奈，亦是萬般氣憤。
老王，為何會弄成這樣......
此時，三人也從後來到了。
「隻戒指係老王平時戴住果隻...睇嚟有人對佢落毒手。」眼鏡娘沉重道。
喪堅嘆了一聲：「唔通係個委託人見成事後，想反悔唔比錢，所以殺左老王？」
「唔一定，亦都可能係李氏家族既人做既。」
的確，從屍體手上的珍珠奶茶，絕對有機會是李氏家族報復所做的。
而且細心一看，珍珠奶茶的杯面上，還寫了幾隻字：
你地通通都要死——
短短幾隻字，令我心頭一顫。
「「你地」係咪講我地幾個...?」喪堅問。
「今次真係白做喇。」妖女苦笑：「仲要比人盯上。」
阿邪毫不留情踹在灰燼上，發洩心頭之恨：「咁果一億點啊？」
「仲諗錢，諗下點樣保命好啦～」
「我地或者應該匿埋一排，避避風頭。」眼鏡娘提議。
「同意。」妖女這次居然贊同她。
喪堅卻深深不忿：「哼，點可以認輸呀？緊係要搵條友出嚟，迫佢交出一億，再斬開九份啦！」
「嘻嘻，今次我撐你呀......」阿邪站在喪堅的一邊。
結果，喪堅和阿邪決定查找真相，妖女和眼鏡娘則選擇暫避風頭。
「Paddy，你呢？」
「我？我諗都係匿埋一排啦。」
「好啦咁。」
嘴上是這樣說......
但我才不會輕易罷手。
既然有人想追撃我們，最好的防備方法便是把他們揪出來。
不過單獨調查，才是我的作風。
「既然係咁，我地之後分道揚鑣啦。」眼鏡娘緊緊盯著屍首說。
「嗯。」我們答。
散眾以後，我並未直接回家，而是乘車前往私家醫院。
去到某間獨立癌症病房，寧靜的空間裡，躺著一個貌美似玉的天使。
她看到我後，先是喜悅一笑，卻又遽然收起笑容。
「Shirley。」
「你嚟喇。」
「有冇食野啊？」
「食唔落。」
醫院的晚餐就放在床邊，有麵包、牛奶、水果，可是無人問津。
「唔好扭計啦，要食野先會好翻嘛。」
「呢四日你去左邊？」
「我...有啲野要忙。」
「係咪又再去隨便殺人？」
我回眸瞧瞧病房的電視，電視正播放著超蓮的新聞。我輕嘆一聲，無言以對。
「即係有啦。」Shirley水汪汪的眼睛直視著我：「應承我，以後唔好再做呢啲事，得唔得？」
她的眼神有種莫名的吸引力，總是叫我難以招架。
我垂垂頭，隔了半响微微開口：「好啦。」
「乖。」
「但你都應承我，快啲食野先。」
Shirley笑逐顏開，翻翻身子，從旁邊的茶几拿起未觸踫過的晚餐，開始用餐。
要金盤洗手嗎？
可惜，職業殺手是一條不歸路。