【懸疑】《珍珠奶茶殺人事件》: ——第九章：中飽私囊——

「Shirley，睇下我帶左咩嚟比你？」
 
「嘩！係黑糖珍珠奶茶！」
 
Shirley喜出望外地接過了「獅子堂」的黑糖珍珠奶茶，愜意的喝起來。
 
但她一邊喝，一邊定睛凝視我。
 
「你個樣好攰咁喎，係咪好多野煩？」
 




「有咩？無咩事煩呀。」
 
「肯定有，你逃唔過我法眼架～」
 
「比你睇穿左添。」我坐在她的身旁：「我煩緊你係咪又唔食醫院比你既飯菜咋。」
 
「車，我食哂啦。」
 
她指向枕邊茶几的盤子，盤子上的食物著實通通清光了。
 




「居然咁聽話？撞親個腦呀你？」我不敢相信。
 
「你就撞親個腦，係因為呢排同醫院既其他院友傾計，有個伯伯既說話影響左我。」她神氣地說。
 
「講左咩啊？」
 
「佢話，以前佢都唔會點食啲醫院飯，因為淡而無味，愈食愈肚餓。直至有一次，佢聽到醫院飯錢原來唔平，唔食就嘥哂錢，結果佢就無再浪費過。」
 
「十足十天橋底啲講故佬喎，你咁都受佢影響？」
 




「因為我一直忽略左錢呢樣野，我唔想你嘥錢咋。」
 
「嘩，好乖喎，咁錫淡先啦。」我靠攏過去。
 
「唔喎！」她彆扭的別過臉。
 
「邊有女朋友唔比男朋友錫架。」
 
「我囉。」
 
「哼。」
 
Shirley剛剛說忽略了錢......
 
驀地，我想通了些什麼。




 
其實除了委託人和受害人家族，還有一類人，老王和喪堅的死會對他們有所得益......
 
就是參與了超蓮謀殺案的殺手。
 
情況有機會是：在老王取得天額報酬，準備回車行分派我們時，其中一個殺手殺掉了他，中飽私囊。事後那殺手再回到茶餐廳與我們聚集，佯裝沒事發生。
 
當時我、喪堅和妖女最先去到餐廳，阿邪和眼鏡娘後來居上，他們兩人可疑最大。
 
但是另一個問題又來了。
 
當時在茶餐廳，我確實收到了老王的信息，而其他殺手亦在現場。
 
那是怎樣做到的？某種電話把戲嗎？
 




或者，他們其實有同黨？
 
在我眼中，阿邪是殺手之中最有可疑———
 
阿邪是白慄山莊者成員，有充分理由要殺超蓮。而且他可能合謀其他成員，先殺掉老王，再一一處理我們。這樣我們合共六億（連同老王），便能被他們私吞。
 
需要觀察一下他。





我發現阿邪的位置後，戴上黑色口罩和灰色鴨嘴帽，開始跟蹤他。
 
阿邪一貫傻乎乎的模樣，在大街小巷漫無目的地遊蕩，我仔細打量他，生怕他有奇怪的舉動。




 
隔了半响，他突然搭上一輛前往新界鄉鎮的小巴。見狀的我，立馬跟隨上車，坐在他幾個位子之後。
 
小巴以時速一百三十的亡命速度，在九曲十三彎的道路奔馳。我緊緊抓住扶手，阿邪卻一臉鬆容。
 
窗外的風景，亦由城市的五光十色，漸漸褪變成翠綠遍遍。
 
「有落！」
 
終於，阿邪在某個偏僻的鄉交路下車，我亦跟著下車，然後屏息跟隨。
 
沿路上，我盡量與他保持距離，在叢草橫生的路上行走。
 
碧海青天，萬籟有聲。大自然過份平靜的氣氛，反而讓我有點不自在。
 




不久後，我發現前方屹立一塊寫著「私人地方，嚴禁闖入」的木牌，木牌的右下方，還寫著「白慄山莊者」五字。
 
看來沒有白忙一場了，我暗自慨嘆。
 
越過木牌，還走了一段路，最後他去到一間村屋門前停下。
 
我連忙找個草叢匿藏，靜觀其變。
 
「咯咯。」他敲敲木門。
 
木門徐徐打開，一個抽著煙斗的肥胖男人踱步而出。
 
「你又嚟做咩呀，走啦。」
 
「比次機會啦，我已經殺左超蓮。」
 
「一日叛徒，一世叛徒。」
 
「求下你啦，比我加入翻白慄山莊者。」
 
阿邪對答如流，沒有半點瘋言瘋話，跟一向我所認識的他大相逕庭。
 
那麼說，之前的癡漢形象，是他捏造出來的吧。
 
用意是什麼？掩飾身份？
 
「區區超蓮，有啲咩用啊，無人想知啊。」
 
「除左咁，我一直都做緊野去補償架喇。」
 
「做野又點？記住，你係抵死架！幫助過李氏家族既走狗，點樣都填補唔翻過錯！」
 
「果時既我財迷心竅啫，我知錯架。」
 
「夠喇，我唔想再同二五仔講野。」
 
肥胖男子砰啪的闔上門。
 
一浪沉默，結果只剩阿邪獨站門外。
 
「睇住嚟，我實會令你地重身接納我。」他對著木門自說。
 
聽完之後，我默默咀嚼他們之間這堆信息。
 
有可能是他曾經幫助李氐家族被趕出來，之後為了重身受到接納，所以把超蓮殺掉，再把我們殺掉嗎？
 
但他們由始至終，並未提及委託的事，亦未提過委託金的幾億元。
 
問題由再次返回原點，委託金何去何從？委託人又是誰？
 
苦思之際，突然有人從後大喊。
 
「喂！你匿喺度做咩啊！」