風之軌跡（校園，戀愛，籃球）: 1%機會
我拖住詩雅行番去入口果面，我雖然唔知佢點解啱啱會咁講。但係令我記起之前阿晴同我講過話我唔了解一樣，令到我個心好似比針吉，有種刺痛嘅感覺。
話咁快，行到去門口同佢地會合。之後我地成班人又坐番公車出去夜市食野，我同詩雅一上車坐低果陣傻韋過左黎。
「健神救下我呀」傻韋講
「點呀，啱啱失敗成點呀」詩雅諷刺傻韋佢講
「啱啱我見到你叫我約小雪佢一齊行，我當然狗衝約佢啦，佢都無拒絕我」傻韋講
「咁咪幾好囉」我講
「我都以為係，點知我地差唔多全程dead air 」傻韋講
「唔會呀，我平時同小雪傾計我地都唔會咁」我講
「你都知傻韋份人講野唔經大腦。小雪佢文學少女咁嘅款，邊到會溝通到呀」詩雅講
「啱喎，我都係因為睇書先識小雪佢」我講
「放棄啦，睇死你唔會成功㗎」詩雅講
「我唔會放棄嘅」傻韋講完又走過去阻住小雪同阿晴
坐左好耐車終於去逢甲夜市。
「好肚餓呀，食咩好」brian講
「分頭行事啦，廢事阻止你地拍拖啦」阿傑講
「你話㗎」brian講完之後就拖住阿玲走左
「重色輕友」我講
「好似講到你唔係咁」阿傑串我
「我邊會呀，我地一齊行」我講
我地講完之後就走入夜市入面睇下有咩食。
「小雪你想食咩呀，我買比你食啦」傻韋講
「我自己買得啦，唔好意思」小雪講
小雪講完之後就走左過黎我同詩雅格離，睇黎佢開始怕左傻韋。
「不如食果樣啦，睇落好似幾好食」阿晴指住一間夜市牛排講
「好呀，食完過對面就有甜品舖，等等可以食甜品」詩雅一講完佢地兩個就已經走左入去。
見到佢地行左入去，咁淨低嘅人都跟佢地入去。
「幫幫手呀」傻韋拉住我件衫講
「都係果句，盡力啦」我講
行到入去已經見到佢地坐低曬，詩雅佢幫我留左個位起佢格離坐。
坐低叫左個牛排鐵板麵，之後就行左出去幫詩雅佢攞野飲。
傻韋見到我咁做就有樣學樣問小雪「飲唔飲野我幫你攞啦」
「唔洗啦，我自己黎就得」小雪一講完就馬上起身追上我
小雪行到我身後同我講「果個人好怪呀，成日都跟住曬又話要幫我攞野」
「你重話自己係愛情小說作家，咁你都唔明」我講
唔好話我唔幫你呀傻韋，今次幫你講曬，比曬助攻啦。
「咩話，你係話佢....」小雪講
「唔係咁明顯都睇唔出呀，估唔到你都反應都幾遲鈍」我講
「但係我已經......有鐘意嘅人啦」佢講
「唔係掛」我講左我心裹面果句出黎
「咁我都無謂再強迫你接受傻韋啦，我以為你無鐘意嘅人先會咁做，唔好意思」我講
「唔緊要啦，反正我係鐘意一個唔會鐘意我嘅人」小雪講
聽到之後都唔知講咩好唯有同佢講句加油，幫佢打氣。
講下講下都唔記得自己係出黎攞野飲，我馬上攞完行番去。
「咁耐呀你地」詩雅講
「多人攞要排隊呀」我亂講
「d野黎齊，食野啦」阿晴對我同小雪講
我地邊食野邊傾計，但係我一直心不在焉，我唔知好唔好同傻韋講。我眼見傻韋宜家重好努力去同小雪傾計，我唔係太忍心。
「阿健！阿健！」詩雅叫我
「你做咩呀，心不在焉咁」詩雅對我講
我講左啱啱嘅事比詩雅聽，佢講完之後笑住同我講「放心啦，你同傻韋講，佢聽完之後佢都唔會放棄㗎。就算會有99%失敗，只要重有1%機會佢都唔會放棄。唔好唔記得佢傻㗎」
「啱喎，我居然諗多左」我笑住講
「其實我有陣時都幾佩服傻韋佢，想做就去做，唔會放棄。相反我自己.....」詩雅講
「講得啱，等等我同佢講先」我講
食完野之後，我地就起夜市行下。我要傻韋有空檔我就走過去同佢講啱啱小雪講嘅野。果然不出詩雅所料，傻韋同我講佢唔會放棄嘅。
「有得射波呀」阿晴對我同傻韋講
「射中有獎，要過來玩嗎」個店員用普通話對我地講
反正食完飯無野做咪挽下。
「每個人射十球，射中8球有獎」店員講
我先，望過去大約距離同射罰球差唔多，我攞起籃球拍左兩下一射，輕鬆入網。
之後再射左5球輕鬆入曬。
我見咁輕鬆咁唯有企後d射，d人見到都企低睇我射波。
我企左起距離大約差唔多三分線嘅位置，我攞住個波拍兩下就起手射波，又一個穿針入網，周圍嘅觀眾都拍手加歡呼。
再射多幾球唔同位置都射入，最後十投十中
「今日幾準喎」我講
「你入到咁，我都廢事班門弄斧啦」傻韋講
店員話可以攞隻公仔走，我就叫詩雅選擇，到最後攞左隻鬆弛熊走。
都挽左好耐差唔多要走，但係突然有個人走過黎講野。
「請問一下，剛剛看你打球好強，請問你有沒有興趣參加3天後的比賽」果個人用普通話同我講
我用我嘅垃圾普通話同佢講我已經有隊伍。
「好吧，3天後見，我叫柏偉，之後球場上見吧」佢講完就走左
「估唔到行行下都會有人叫打波」我講
「邊個叫你射波射到咁咩」阿晴笑住講
我地講完之後啱啱好有車，而brian佢地都啱啱好到，可以一齊上車。
好快又坐到番酒店，我地又分散番自己間房。brian同阿玲話聽日都係自己行，而阿傑又話要自己行。
我同詩雅上到房，我就話要去沖個涼先，我攞曬衫入去沖涼。
我好快就沖涼到佢沖。
「你又沖」我講
「我習慣左出去一次沖一次」詩雅一講完先走左入去沖涼
我行過去攞風筒吹頭，坐低吹頭果陣我見到張枱上面有2個安全套。令到我諗起我家姐同我講記得戴套，我忍唔住笑左出黎。
我行番去張床上面挽手機，挽挽下詩雅就走左出黎。佢只係穿上一件背心同短褲就出黎吹頭，吹完頭髮佢就走左上床。
我成世人第一次同女訓起同一張床。佢望住我同我講「阿健，如果以後我地分開左唔會再見，你會唔會又唔記得我㗎，好似以前咁」
「無啦啦點會分開呀，你以後都會一直起我身邊」我將佢抱入懷中
「我係話如果」佢好認真問我
「以前嘅我太細個，好多野都唔識，所以會唔記得你。但係宜家嘅我唔會唔記得你，因為你係我嘅唯一」我講
「你話㗎，你唔好唔記得我呀」佢一講完就合埋眼訓教
我見佢想訓覺，我就關左d燈佢，抱住佢入睡。