我要係20歲之前，將女神變做女朋友: 第九節:悵惘

佢訓到第二堂嘅老師嚟到，佢擘大眼嗰下我即刻擰去另一邊。

老師嚟到我先知原來我望住佢已經足足有十分鐘以上，諗起都覺得自己成個痴漢咁.......

佢伸左個懶腰之後就比返件衫我仲同我講:

"比妳望到哂我訓覺個樣添，唔該哂你借件外套比我啦!"

"吓我無睇到妳訓個樣呀，我一路都玩緊手機。"



"你真係唔識講大話~"

佢笑一笑就拉開書包搵筆記，我都分唔到佢係講緊笑定佢真係知道我一直望住佢......

今堂同上晝果一堂差好遠，我同佢之間多左好多計傾，唔似朝早咁死氣沉沉。

"係喎妳做咩食完個飯之後多左咁多野講嘅?今朝妳靜到我都唔夠膽同你講野。"

"咁樣你都睇唔出?都唔知話你蠢定傻，今朝純粹唔夠訓啫。"



"哦~我見妳黑哂面咁以為你唔鐘意同我坐添。"

"都係架因為我唔太鐘意同啲陌生人有交流。"

我一時間唔知點覆佢好......咁岩老師講今日提早落堂，佢聽到之後即刻收好份筆記，我連byebye都未同佢講，佢已經一枝箭咁仲快過老師衝左出門口。

佢岩岩講講句野一直係我腦海徘徊，佢當我陌生人但又主動同我傾計，究竟我同佢算唔算做左朋友.......

我由學校行去地鐵站依段路一直係到諗，諗我同佢係唔係真係連朋友都做唔成，諗佢會唔會真係唔鐘意.......同我坐。



上到月台我仲一路搵緊佢嘅身影，明知佢早過我走我依然仲希望見到佢，當然成個月台都無佢嘅身影。

話哂佢真係女神級，我依啲平平無奇嘅人點會比佢睇得起，連朋友都做唔成都好嘅，可以比我自己知道連少少機會都無.......