我要係20歲之前，將女神變做女朋友: 第二十五節:往事

"所以果次我約妳食飯妳推左我?"

"都算係呀，咁我要趕返屋企煮飯嘛!"

"原來係咁~估唔到妳平時係忙屋企野。"

"咁我問返妳啊，你以為我平時忙啲咩?"

"我以為妳平時........其實我都無諗過。"



佢講完之後又快步行:

"行快幾步啦，我真係好肚餓~"

其實我係有諗過以為係佢要出夜街同男朋友要求佢先要六點前返到屋企，但點知原來係屋企人限制左佢。

我地快步行左大約兩分鐘就到左最近嘅OK，佢一枝箭衝左去熟食counter，而我就係側邊睇零食:

"阿冬阿冬我想食牛仔片呀~"



"妳食完個撈麵仲食得落零食呀?"

"得呀，仲有你呀嘛~"

我拎左包牛仔片去比錢佢就係後面講:

"多謝阿冬~"

我地買完撈麵就諗住返學校食，我地咁岩經過附近嘅一個公園，Katarina叫停左我:



"我想打一陣鞦韆~"

我幫佢拎住袋麵佢就衝左過去~

我係側邊望住佢，佢十足十個小朋友咁係到玩，如果唔係兩隻手都拎住野我諗我會偷偷地影低佢~

公園愈嚟愈多小朋友，Katarina見有小朋友想玩就讓左比佢:

"喂你頭先望住我笑咩呀?"

"吓我有笑咩，我自己都唔知喎。"

"講!!!妳頭先笑咩?"

面對住佢嘅威勢所迫我好坦白咁同佢講:



"我覺得妳好似個大細路啫，有得玩就開心~"

我講完之後見到佢塊面有少少紅，睇嚟佢都有怕羞嘅一面~

"行啦碗麵凍哂啦!!!"

佢講完就快步行先，睇嚟佢真係比我講完之後有啲尷尬~

返到學校我地係樓下慢慢食完野先上返去上堂。

放學嘅時候小櫻襯Katarina走左就走過嚟問我:

"喂冬仔你頭先同Katarina去左邊呀~去左咁耐先返嚟嘅~"



"無去邊呀，陪佢買啲野食渣。"

"睇嚟係佢約你出去陪佢買野食喎，我頭先見佢晏晝無食過野。"

真係無野可以瞞得到小櫻，有時我仲會覺得佢係依方面有啲恐怖.....

"係呀佢約我架。"

"咁咪幾好囉，女仔主動約你喎，係一件好事嚟~"

"我唔理啦走先啦~"

小櫻岩岩果句擺弱明有啲暗示，我廢事比佢繼續套料就走左人~