《無啦啦多左幾個家姐同細妹Season 3》: 夥伴

扣除我，Sarah同Ellen，仲有四個我既好朋友係度。
 
佢地分別係阿Ray，阿輝，浩銘同阿嵐，四個都係仔。
 
阿嵐：「搞咩呀阿明call得我地咁急，我尋晚先返完通宵7仔，訓得一個鐘又俾你call左出黎，好眼訓呀頂…」
 
呢個阿嵐，靚靚仔仔白白淨，剩睇呢樣應該可以做到萬人迷，可惜佢成撚日擺出一對死魚眼，仲要開口埋口嗌眼訓，認真趕客。
 
我：「頂，梗係有緊要野先叫哂你地出黎啦，記唔記得我地之前個創業大計呀？」
 


Ray：「記係記得，但我地應該唔夠資金架，個陣仲話打算大家打兩三年工先，等大家可以儲落多D錢先再reboot呢個計劃，唔係咩。」
 
至於呢個阿Ray，佢係我地五個入面讀書最好，完全係學霸level，四年來既所有project唔多唔少都係靠佢carry。
 
我：「無錯，早兩日的確仲係咁，不過呢，尋日比我知道有個財團打算開辦一個「青年創業支援基金」之類既野，我覺得呢個對我地黎講係一個絕好既機會，你地話係咪？」
 
阿輝：「吓，會唔會有咁岩得咁橋呀，而且d大財團成日都有黑幕，呢個基金會唔會係內定架，定抑或有其他陰謀架。」
 
阿輝呢個人成日都疑神疑鬼，成日都有好多陰謀論，但唔到你唔服既係佢既直覺周不時都好準，有幾次考試題目都比佢鳩up講中。
 


今次都好準，咁都比佢sense到呢個青年創業支援基金有問題，聽到個下真係出左一身冷汗。
 
正當我仲煩緊點樣拆佢呢個問題既時候，一直坐係我地隔離枱既Ellen突然企左起身，叉住腰望住我地幾個男仔。
 
Ellen：「喂你幾個係咪男人黎架，唔夠錢搞生意都算啦呢樣唔怪得你地，但而家面前有一個可以實現夢想既機會又係度疑神疑鬼猶豫不決，唔珍惜機會仲要係度話人地有陰謀，呸！」
 
嗚呀，Ellen係完全無先兆既情況下突然發脾氣，妙語連珠機關槍咁炮打阿輝一鑊甘，聽到在場既所有人都目瞪口呆，唯獨阿輝一個無反應。
 
阿輝：「咁突然有個不知來歷既青年創業支援基金，我有所懷疑都係好合理啫。而且小姐你邊位呀？我好似唔識你架喎。」
 


無錯，今次其實係佢地第一次見面，唔係淨指Sarah Ellen，就連Ellie Anna 同Yui佢地都無見過。
 
唔係我專登收埋女朋友唔比佢地見，係真係咁岩無呢個機會。
 
Ellen：「哈！陳煒明你話比佢地知我地係邊位啦！」
 
喂阿姐，你自己同人嘈做乜要拉埋我落水呀，我無辜架好無，自己的事自己做ok？
 
當然，呢D說話都只局限於我內心啦，我又點敢當眾落佢面吖，Ellen大人喎。
 
我：「我女朋友黎架，一人少句啦，大家都係想件事好啫，無謂勞氣。」
 
浩銘：「邊個係女朋友？發哂脾氣呢個定係旁邊個位一直好好笑容既靚姐姐呀？」
 
一直都無講野，只係掛住食既浩銘一聽到有八卦野雙眼即刻發光，差d將手中份墨西哥捲扔埋一邊。


 
 
浩銘可以話係我地之間既正能量，就算幾時都好佢總係笑住黎面對，呢份正能量真係不可多得。係呢幾年來有好多難搞project都係因為佢既正能量先安然渡過。
 
不過屌那星，點解話題突然轉左去呢邊架，我地仲要傾正經野架喂。
 
Sarah：「我地都係佢女朋友呀~」
 
唉，麻煩啦今次。