《無啦啦多左幾個家姐同細妹Season 3》: 加油

Ellie並無對我地幼稚既想法表達任何負面既說話，反而好支持，仲話完全唔幼稚，可以將興趣化成事業唔係個個可以做到。
 
佢仲好快手咁幫我完成左我地一直都解決唔到既難題，更好耐心對我解釋當中既內容，等我可以消化入面既信息，到時present可以更流𣈱。
 
可惜既係，我大部分都聽唔明，不過我都堅持聽落去，畢竟係Ellie一番心機，消化到幾多就自己造化啦。
 
多得Ellie，我地既計劃書終於可以叫做完成，而家就只係差去present…
 
一諗到呢樣，我就不禁嘆左一口氣。
 


明明下星期先present，而家已經開始緊張，我真係有無搞錯…嗯…？
 
係無心掃瞄之下，我發現我檯面上居然有一個從來未見過既盒。
 
我懷住好奇既心，慢慢咁打開呢個盒。
 
起初我都仲有一刻懷疑呢個會唔會係乜惡作劇，例如d一打開就會彈出黎嚇人之類既野。
 
不過結果話俾我地知唔係，入面並無乜野機關，只係又有一個盒同一本記事簿。
 


盒中有盒特別吸引人既注意，我亦因為咁而決定先打開呢個盒。
 
「嘩…你地幾個真係吖…整多粒洗死咩…」
 
無錯，我真係自己同自己講野，係自己間房入面。
 
之所以會有咁既反應，全因為盒入面既內容，四粒朱古力。
 
每粒朱古力下面都有一張memo紙，分別寫住佢地四個既名同一D打氣既說話，我諗咁係代表邊一粒係邊個整。
 


其實見到呢下個心就真係好warm既，不過美中不足既係每個人係得一粒，無得回味。
 
我猶豫左一陣，最後都係決定合返上呢盒朱古力，放入房入面既小雪櫃。
 
呢份心意，我想遲D先好好品嚐同感受。
 
跟住落黎就係本記事簿喇…睇下先…咦係Ellen手字黎wor…
 
我再仔細閱讀入面既內容，發現全部都係關於之前Ellie幫我做既報告。
 
每一個重點都有特別解釋說明，仲有螢光筆間下，十足十大學take notes咁。
 
周不時佢仲有係旁邊畫D公仔打打氣，話呢個位好重要一定要記住之類，好有Ellen既風格。
 
真有你的，Ellen。


 
佢地個個都咁支持我，咁我都無籍口唔努力啦。
 
仲有三日就要去公司present，努力準備埋佢啦。
 
講開又講，自從開始準備呢個present之後，我一直都避開大家姐。
 
我唔想俾佢知道我地既情況，令佢到時會有偏私既可能。
 
諗落都幾諷刺，明明開頭只係打算借呢個基金個名黎等自己有借口拎多筆錢出黎，但而家居然咁認真去做，諗極都唔明點解會變成咁。
 
不過唔緊要啦，而家咁都幾好既，都好耐無咁認真看待一件事喇。
 
就係咁，話咁快又三日，今日就係去公司present既大日子。
 


大家都著起西裝，係呢四五年來第一次。
 
從表情上可以睇得出大家都好緊張，就連長期死魚眼既阿嵐都夾硬撐大隻眼，老實講我都鄧佢辛苦。
 
不過我邊有資格話人吖，明明自己隻手已經震到不得了，Ellen為我寫個本記事簿都幾乎比我揸爛。
 
深呼吸，合埋雙眼呢d方法都無辦法緩解我既緊張，反而令我feel到自己個心跳得愈來愈快。
 
「陳先生，到你地喇，請入黎喇。」
 
就係我仲摸索緊可以舒緩緊張既方法既時候，秘書姐姐就推開會議室既門，行左出黎叫我地。
 
唉無啦無啦，死就死喇。
 
我地五個人交換左一下眼神，咩都無講之下一齊企起身，行入會議室。


 
一入到去，就已經見到大家姐坐係長檯既對面，同我地距離好遠，但依舊可以睇到佢既笑容。
 
大家姐：「你地隨時可以開介紹你地既計劃書。」
 
準備左咁耐，就係為左呢一刻，上呀！！