《無啦啦多左幾個家姐同細妹Season 3》: 重來

啊呢？點解我…會係泳池邊訓著左既？
 
我記得尋晚我係度挨住Ellie大脾…啊…就係咁樣訓著左啊…
 
呼…尋晚真係失禮死人，竟然係自己女朋友面前咁既樣…
 
不過而家個心好似真係舒服左好多，無左尋晚個種刺痛。
 
咦尋晚無沖涼成身都痴笠笠，都係快D返上房沖個涼先。
 


但當行返入廳既時候，我被眼前既景象徹底嚇傻左。
 
呢四個人居然仲係度，仲係餐檯度訓著左。
 
唔通係擔心我，所以一直都留係度！？哎呀呢幾個傻妹真係吖…
 
我都不禁流下兩滴眼淚添。
 
大家姐：「佢地幾個真係傻得可愛呢，你話係咪？」
 


哇嚇我一跳，大家姐又會突然係人地背後出現既，唔好搞我後面呀唔該。
 
我：「係啊…雖然傻，但又令人愛不惜手，真係令人頭痛。」
 
大家姐：「你既情況我聽左佢地講啦，如果你真係捱唔住既話就退出啦，大家姐可以私人俾筆錢你，咁你就可以…」
 
我：「唔可以，我唔會退出。」
 
大家姐：「哦？點解既？」
 


我：「佢地咁為我著想咁支持我，如果我因為少少壓力就放棄咪好對佢地唔住？」
 
「我更應該要堅持落去，做埸好既比佢地睇先係。」
 
大家姐聽到頭頭是道，差在未拍手，不過無拍手都好，免得嘈醒佢地四個。
 
大家姐：「咁先係我既好細佬架嘛，幾驚你會應承呀，過黎！俾大家姐攬下你！」
 
面對大家姐既步步進逼，我反射性地向後退，一黎記起自己未沖涼，二黎係深知大家姐既擁抱係「異常」有力，怕自己某d地方「抖唔到氣」，所以都係不了。
 
係一輪攻守之下，大家姐最終都係放棄左，而我亦成功逃回自己房，終於可以沖到涼。
 
沖涼既時候我係度諗，自己應該要為佢地四個表示返D心意先係。
 
雖然唔係話好叻，但我都應該可以做到，一於試下啦。


 
蛋，煙肉，多士，咁樣做早餐的話應該就夠啦我諗…？
 
不過話時話，我好似都係第一次係呢個廚房入面煮野食，平時都係蘭姨又或者Sarah Yui佢地用呢個廚房。
 
好彩我平日睇地獄廚房同Gordon Ramsay睇得多，呢種程度既早餐都唔算係咩問題。
 
但份量方面似乎掌握得未夠好，煮得太多啦，連多士都可以整左六件出黎。
 
好啦而家既問題係…佢地伏係左餐檯，我可以點放野食而唔嘈醒佢地呢？
 
就係我仲諗緊點解決呢個問題既時候，蘭姨就行左入黎，我既救星。
 
有蘭姨既協助之下，我先得以順利係唔嘈醒佢地既情況下擺好所有早餐。
 


而家就只係差叫醒佢地…咦咦咦？做乜一個兩個突然自己醒左架？？
 
Sarah：「唔…好香…」
 
Ellen：「咦…我幾時訓著左架…？」
 
Ellie：「我地無返到屋企咩…？」
 
Yui：「點解會有早餐係面前既..？」
 
一人一句都唔知應該答邊個先好，唯有講句早晨先。
 
佢地幾個馬上就望左過黎，見到我成個人棟係度雙眼即刻變得水汪汪，好似喊出黎。
 
男人不該讓女人流涙，於是我急忙安慰佢地，仲試圖將佢地既注意力移返去早餐度，標榜我親手製作。


 
咁難得既事當然成功吸引到佢地啦，佢地個個即刻望住碟早餐，望到兩眼發光。
 
我：「食啦唔洗望啦。」
 
得到我既「恩准」之後，佢地即刻開動引擎，品嚐由我炮製既佳餚。
 
而我，卻望住放係一角既第六份早餐。
 
我終於知道自己點解會整左六份出黎，因為我下意識整埋Anna個份。
 
一時興起之下，我將呢份早餐影低左，仲send比Anna。
 
雖然唔知佢幾時先會睇到，時差呢D野我唔識計，但我知佢總會睇到。
 


我只係想佢知道我並無忘記佢，佢一直都仲係我心入面。
 
我再望坐係餐檯既四位美女，再一次暗自講左句多謝。
 
多謝你地為我呢個傻人付出咁多。
 
接下來，要做正事了，重新出發啦。