《無啦啦多左幾個家姐同細妹Season 3》: 理由

佢既身影慢慢遠去，最後被黑暗所吞沒。
 
我無追上去問佢既真正身份，因為已經無咁既必要。
 
而家要做既就只有一樣，就係努力去玩呢個比賽，嬴佢。
 
嬴到佢之後唔只可以達成原先既目標，仲可以知佢既身份，可以話係一石二鳥。
 
所以一定要贏，為左我自己，為左大家既夢想。
 


雖然我唔明佢點解咁憎我，但係我係聽完佢既挑釁之後真係無名火起。
 
明知係挑釁，但我都接受，我真係on99。
 
不過而家腦入面全部都係諗點先可以贏到佢，佢咁有自信黎宣戰，一定胸有成竹，即係話我地都要好好準備先得。
 
嗯…返去同佢哋好好商量先得…
 
咦，點講好呢？我而家…好似好有鬥志咁？
 


唔…又唔係壞事黎我諗？
 
而家既問題係應該要點同阿輝佢哋講先好？唔通直接講話有人已經視我地為最大對手？
 
我一邊思考呢個問題，一邊行返大屋，入到屋發現大家已經hea完坐埋一齊傾緊方針。
 
領頭居然係阿嵐，其他人都係度好留心聽，好罕有既場面。
 
除左阿嵐之外無人留意到我，我亦籍住呢個機悄悄地坐喺大家後面聽阿嵐講野。
 


聽落發現原來佢哋係討論緊有關「event」既可能性，仲傾得有文有路，特別係針對於今日被沒收私伙野食個組既地方。
 
既然主辦方咁著緊係呢方面，即係話我哋係開頭既推測係岩，重點係食物券。
 
我：「會唔會…佢哋會係第三四日玩通脹，要兩張食物券先可以？」
 
此話一出，大家都望住我，個個都靈機一觸咁款。
 
阿Ray：「你覺得具體會係會點做？」
 
我：「eh…或者話食材供應唔穩定？反正我哋而家都接觸唔到外面既資訊，所有野任佢地講都得啦係咪先？」
 
大家都聽到頭頭是道，睇黎我今次都有返D用了。
 
至於點解會係第三四日，其實諗落都好簡單，就係等人鬆懈之後黎料，而且呢兩日正正就可以當成一個高潮位，所以九成係呢兩日出event。


 
咁我哋現階段可以做D乜？好老實講，無乜實質野可以做，可以做既就只有偵察。
 
睇吓有冇人同我哋一樣盯上左個組白癡同埋佢哋既動向，嗯…諗落其實都幾重要？
 
如果個組人突然忍唔住咁傻豬用返金幣同系統買食物券既話我哋就真係前功盡廢了…哈哈…
 
我：「我諗應該要搵個人監視下我哋個target…報告下佢哋動態都好，方便決定我哋幾時出手。」
 
浩銘：「嗯，呢個就交比我啦，不過係都係聽日先開始啦，今晚大家就早D休息。」
 
的確係一個好提議，特別對阿嵐黎講。
 
不過我就訓唔到住，自己一個坐係廳。
 


把口就話唔諗，但個腦點諗有時我自己都控制唔到，而家就係呢個情況。
 
我無辦法唔去諗個個Ashely既身份同埋佢咁憎我既理由。
 
Ashley呢個名我真係一D印象都無…唔係既，呢個可能都係假名，唔需要太深究。
 
但佢提到既「個個人」就應該係真係存在，如果唔係一切就斛唔通。
 
今次我又得罪左邊個呢…
 
就係我不斷思索既時候，一股涼意突然襲向我後頸。
 
不過今次唔係咩特別事，只係有人拎住一罐雪到凍一凍既啤酒同我玩下啫。
 
係阿輝。


 
我：「哦？你都訓唔著呀？」
 
阿輝：「算係啦，仲諗緊比賽D野。」
 
總係覺得阿輝今次比以往都要更加認真，好似非贏不可咁…
 
唔係…比起贏，佢好似更加想去證明一D野…
 
我：「點解你今次好似特別緊張咁？明明以前你遇到咩大事都唔會好似今次咁神經質架。」
 
聽到我咁講，佢長嘆左一口氣，之後打開罐啤酒，卻無馬上𣈱飲起來，而係望住天花。
 
阿輝：「我細個果陣我老豆因為信左人地一句說話，將成副身家dup哂落去一盤生意上，最後輸到乜都無。」
 


「點講好呢，我唔想犯同樣既錯囉可能，特別係呢個咁類似既情況下，我唔想信錯人，所以想自己掌握多D。」
 
「我怕，而且憎人地呃我。」
 
…