《無啦啦多左幾個家姐同細妹Season 3》: 成熟

屌那星，食到好飽。
 
D野食唔只睇得，仲好好味，特別係Anna既威靈頓牛柳，真係好好食，個種口感到而家仍然歷歷在目，啊唔係，呢D時候應該係用齒頰留香先岩？唉是但啦差唔多啫。
 
最後仲有Yui新嘗試整既布丁做收尾，簡直就係perfect。
 
啊~真係好滿足。
 
唔只係胃袋上既滿足，比起胃袋，心靈上既滿足更加大。
 


可以再一次同佢哋五個一齊食飯，一齊閒話家常笑到on9咁，真係好開心。
 
我居然有一刻閃過「時間可以永遠停係呢刻就好」咁既諗法，真係唔掂呢。
 
而家既情況唔容許我有呢D咁無志氣既諗法，我呢一刻仲未可以安於現狀先係，要學奧加團長講既咁，不斷向前行，直至靠自己雙手真真正正闖出一番事業先得。
 
咁亦係對Anna咁努力既一種回報。
 
首先都係好好處理左模型工作室既開張問題先啦，休息左咁耐都夠架啦，要回歸戰綫幫大家手先得。
 


好，聽日就聯絡大家啦，就咁決定。
 
「喂傻仔明，做乜自己一個係度呀，唔返過去同Sarah佢哋傾計？Yui仲沖左茶，可以消滯喎。」
 
會咁叫我既人可以有邊個吖，咪就係Anna囉。
 
佢拎住兩杯茶慢慢坐低係我旁邊，我見狀亦馬上接過其中一杯，扶住佢坐低，避免倒瀉。
 
嗯，飯後飲杯茶都唔錯，仲有月光相伴，意境即時高尚左唔少。
 


Anna：「你…好似變左。」
 
我：「變靚仔左？」
 
Anna：「呢個又唔覺得，反而覺得你好似肥左D就真。」
 
搞錯呀，居然話我肥左，好傷我心囉。
 
Anna：「我意思係只係一排無見你好似成熟左D，個人沉著左，個D叫做咩呢？氣場？係囉氣場唔同左，我就係有咁既感覺。」
 
嗯，或者係因為你既離開啦，你個陣同我講既野可以話係引導我去到呢一步既契機。
 
所以其實我都好多謝你架。
 
我：「畢竟我都廿幾歲，總唔可以一直成個𡃁仔咁架嘛，扮熱血漫畫主角既日子完左啦。」


 
Anna：「係咩，我仲以為你係因為死過返生所以先開竅添。」
 
「講真吖，當時我係英國聽到Sarah佢哋話你出左事，仲話係中毒個陣我真係勁驚，個腦即刻空白左，完全唔知應該點做好。」
 
「最後唯一諗到既就係即刻返黎先喇，啊~~睇黎我都仲係唔夠成熟，被感情主導左行動。」
 
佢一邊講一邊伸懶腰，將佢美妙既身體曲線展示係我面前。
 
到最後，我都係令我想保護既人擔心我，明明已經…
 
我：「無論道幾多次歉都好，真係覺得好對唔住你哋幾個，特別係你。」
 
Anna：「哦？居然係我？真係受寵若驚喎阿明哥~因為我特登係英國返黎？」
 


佢講野真係…一時又咁催涙一時又咁有骨，真係正宗一啖砂糖一啖屎呀…
 
我：「嗯…你係因為想第時幫到我手所以先去英國讀書，結果又因為我要專登走返黎。」
 
Anna：「一直都係咁架啦，由中學開始就係咁，一直都係因為你而發生種種既事。」
 
「但係我想你知道既係，我從來都無後悔過呀，應該話如果無你的話我一定唔會有咁精彩既人生，識到咁多既朋友。」
 
因為我…先有咁精彩既人生？
 
Anna：「道歉係無用架，既然你話唔可以一直成個𡃁仔咁，咁就成熟D比我睇，諗辦法解決個問題，同埋用盡所有方法去避免同類型既情況再發生，咁先係…」
 
Anna佢並未講完成句野，就係佢即將收尾既之際忽然停下，好似若有所思咁笑左一笑，之後就走左黎我面前，仲貼得好近，近到我都有D尷尬。
 
我：「做乜…」


 
今次到我並未講得完成句野，但唔同既係咁並非我既本意，我係被迫停低既。
 
因為Anna佢襯我開口講野既空檔一下就錫左落黎，塞住我把口。
 
對於呢下攻擊，我可以話毫無防備，卻係一瞬間投入左入去。
 
呢一個kiss，可以話黎得相當合時呢…個腦馬上變得一片空白，剩低既就只有由咀唇傳黎既觸感，相當柔軟…
 
但開心既時光總係過得特別快，畢竟一個茄輪唔可以打成世架嘛，Anna好快就往後退返一步，對我wink左一下。
 
Anna：「好啦，幫你入左油架啦，快D去收拾件事，將個女仔搵出黎啦。」
 
嗯，我明白喇…咦咪住先…
 


你係點知道對方係個女仔黎架！？