《無啦啦多左幾個家姐同細妹Season 3》: 愧疚

所有野都按照計劃進行中，鋪頭裝修差唔多完成，面具既調查亦都係Anna既提醒下，透過用公司既資源得到相關公司既資料。
 
可惜換黎既係一大疊資料，堆到幾乎有我張書枱咁高。
 
雖然有太多資料，但我都即刻去睇，因為時間已經唔剩好多了。
 
指既係Anna留低既日子，只剩三日。
 
我都唔知應該做咩好，只係識陪下佢呢度去個度去下，買下野準備返英國用咁。
 


佢無特別講D乜，只係同平時一樣，閒話家常。
 
啊都唔完全係既，佢有催我快D去睇資料，但被我一口拒絕，而且唔只一次。
 
資料可以遲D再睇，但佢過多三日就要返去，傻既都知道應該點排先後次序啦。
 
咁岩既係，Sarah佢地四個呢幾日都話有野做唔得閒，所以就演變成得返我同Anna兩個。
 
明眼人都知道，所謂既有野做其實只不過為左令我同Anna可以有多D時間獨處既藉口啫。
 


不過，又會有邊個會想去揭穿呢個美麗的謊言吖，大家心知咪得囉。
 
話說今日我又係同Anna去買野，但奇怪既係佢今日購物既地方居然係超級市場。
 
佢買既居然係公仔麵，甚至仲有營多！？佢有食過營多架咩？？
 
我：「你買呢D做咩？」
 
Anna：「嗯？哦呢D係幫個邊D朋友買架，佢地知我要返香港就即刻落Order啦。」
 


我：「哦…咁你知道呢包咩黎？」
 
「呢包」指既就係佢頭先大手購入既營多，因為我真係好好奇佢知唔知咩係營多。
 
Anna：「營多麼需要你吖嘛，你真係當本小姐無知，我係英國個陣班朋友有整過比我食，但無諗過咁細細包野居然可以煮到咁好食既野，啊仲要買利賓納糖，差D唔記得左添，呢個都好好食。」
 
Anna…都變左唔少…
 
之後我地拎住一袋…啊唔係，應該係我一個人拎住一袋二袋陪佢去左一間餐廳食tea。
 
人地見到我拎住咁多即食麵都用好奇怪既眼光望住我，都可以理解，呢度成兩箱出前一丁加十袋營多喎…可以食到生cancer啦…
 
但Anna亳不在意呢D目光，只顧享受佢眼前既凍檸茶同為佢碗車仔麵影相留念。
 
我：「話時話，點解黎呢度食既？我印象中無同過你地黎呢度食野架？」


 
Anna：「係呀，呢度都係我D朋友推介既，估唔到真係唔差wor~」
 
又係朋友…
 
我：「我想問呢…」
 
Anna：「女仔黎架傻仔明~唔洗驚喎~」
 
！？點解佢會知道我心入面諗緊咩架？？？
 
Anna：「你咩都放哂係面度，梗係估到你諗咩啦~唉呀你真係得意。」
 
佢一邊講一邊托住頭用未拆封既筷子輕輕篤我既鼻，雖然只係一個小小既動作，但點講好呢…
 


佢咁做既個一瞬間，我個心跳得好快，超級快個種。
 
唉，但一諗到三日後就見唔到佢，咩心情都無哂。
 
點解我呢個死人腦偏偏係呢個時候先轉唔郁架？？快D諗下可以帶Anna去邊啦大哥！
 
帶佢去Ellie個「樂團」？唔得啦人地做野地方唔可以亂去。
 
咁同佢去聖所羅王？今日星期日學校無人喎但係…
 
啊…我諗到啦…
 
Anna：「阿明。」
 
就係我岩岩諗到應該帶佢去邊既時候佢忽然叫我，令我慌張左一下。


 
Anna：「其實咁樣同你出黎行街食下野真係好開心，明明只係好普通既野，但我唔知點解就係覺得好開心，比起大家都係度個陣更加開心。」
 
「所以應承我，唔好有事，等我下次返黎再陪我咁樣拍拖好無？」
 
聽到佢咁講，我一時間無法回答。
 
唔係因為唔識點答，而係因為…震驚？我無諗過原來佢仲係咁擔心我既安危。
 
堂堂一個大男人居然無辦法消除女朋友既擔憂，太差了。
 
我嘆左一口氣，暗罵自己一番，順便鼓起一次勇氣。
 
我：「我一陣帶你去一個地方。」