《無啦啦多左幾個家姐同細妹Season 3》: 焦躁

阿日唔見左呢個消息一傳入我耳我馬上就感到背後一涼，甚至不自控打左個冷震。
 
Ellie同我估既野終究都係發生左，而且比我想像中黎得更加快。
 
咦咪住先…係邊個通知大家姐阿日唔見左？會唔會頭先同大家姐講電話既就係二家姐？
 
不過諗真D應該無乜可能先係，如果係二家姐打黎大家姐應該唔會咁疑惑，應該會避開我去聽電話。
 
咁會係邊個打黎話比大家姐知阿日唔見左？啊我估到喇應該係阿月…因為係陌生既號碼所以先遲疑左一下…
 


只要我而家跟住大家姐一齊去的話咁咪有機會見到二家姐？
 
正當我打緊自己既小算盤既時候，大家姐就已經拎左手袋行緊去門口，我本來想跟埋去，卻馬上就被大家姐叫住。
 
大家姐：「阿May既事遲D再講，我而家要出一出去。」
 
我：「我都…」
 
大家姐：「而家唔係一個適當既時候，乖，返去先啦我會再搵機會同你講。」
 


既然大家姐講到咁…我都唔應該繼續堅持…我諗佢真係去見二家姐…
 
咦！咪住先！點解我會而家先諗起架？
 
如果阿日咁樣唔見左，理由就只有一個，就係為左再向我尋仇。
 
而家我無事，咁佢會唔會對其他人落手架？Sarah佢地呀！
 
Ellie係保安好嚴密既實驗室應該唔會有問題，但其餘話要去café既三個就…
 


唉唔好諗咁多，總知就要快D去搵佢地啦，唉但我又唔知佢地係去邊間café…呀唔係wor我而家即刻whatsapp佢地問地址咪得囉？
 
我無俾自己停下同思考既時間，馬上就行，一邊行一邊問佢地而家係邊順便確認佢地係咪安全。
 
係得到地址之後我馬上離開公司，係街求其截左架的士就直奔café，一分鐘都唔敢浪費。
 
萬幸既係呢位師父手勢好好，好快就送左我去目的地，我拎諗都無諗就拋低張五百紙搭多句唔洗找就衝左落車。
 
落車之後左右望左兩望，確認café既位置之後就即刻跑入去尋找佢地三個既身影。
 
皇天不負有心人，好快就比我係近櫃枱附近既高腳枱搵到佢地三個，佢地仲同緊一個短頭髮既姐姐笑談廣東話。
 
呼…嚇死我，好彩佢地無事啫…嚇到我成個背脊濕哂…
 
唔知係咪我太過顯眼定係佢地觀察力太好，我都未走埋去三位靚女就已經見到我，仲好興奮咁向我揮手。


 
真係吖虧我仲一路擔驚受怕直飛過黎…諗起都覺得自己白痴…
 
不過最緊要係佢地無事啫，自己辛苦D又有乜所謂…
 
無錯，所以我最後都係一笑置之，慢慢走近佢地度。
 
Sarah：「阿明~咁快就黎到既？」
 
我：「eh…無呀我坐的士黎所以好快就到咁囉。」
 
Ellen：「係喎！你去完Ellie度佢有冇講d咩呀？佢覺得個蛋糕點？」
 
我都估到Ellen一見到我就會問呢樣野架啦，呢個做家姐既一定好在意細妹點睇自己親手整既蛋糕，恨不得第一時間知道反應同感想。
 


我：「咩呀我咪whatsapp左你囉，你無睇到咩？」
 
Ellen：「唔係呀我想知佢食完有乜反應同感想呀，黎吖快D過黎坐低話我知！」
 
大家都知道我呢D角色係老闆面前係一D話語權都無，只能夠乖乖聽話，所以我就坐係佢地旁邊，將頭先所有野都講哂俾佢地聽。
 
當然唔係真係全部啦，阿日既事我無講到，畢竟唔想嚇親佢地，而且旁邊仲有街外人，唔係幾方便講。
 
感覺非常之矛盾，其實我一路陪住佢地嘻嘻哈哈傾計既時候自己既心情仍然係非常焦急，好怕阿日會突然出現傷害佢地。
 
不過好彩既係呢件事並無發生，最後我地可以安全返屋企。
 
甚至係之後既一個月仍然係咩事都無發生。
 
我有將件事同佢地講，等佢地出入小心D，帶返兩個保鏢之類，但阿日就係唔出現，我地亦無辦法搵到佢，情況陷入膠著。


 
大家姐當然有派人搵，但聽講最令人頭痛既地方係阿日係失蹤前帶走左一套之前個款面具，即係話佢可以用面具變成任何人，大大增加搵佢既難度。
 
但點解佢咁耐都仍然咩都唔做呢？佢到底盤算緊D咩？諗唔通呢件事令人非常之煩燥，做野都無心機。
 
呢一個月詭異既寧靜顯得特別既漫長，好難捱。
 
但就係一日，一個人既出現劃破左呢一片虛偽既寜靜。