《無啦啦多左幾個家姐同細妹Season 3》: 決心

當下我完全唔知應該點俾反應先好，大腦仍然處理緊剛才佢講既說話。
 
直至晨哥叫我我既魂魄先重新歸位，重回現實。
 
晨：「人地同你講野呀，唔好咁串，俾D反應好無？」
 
我：「啊…我…」
 
屌你咩，我都仲未load到發生左乜事就chur鳩我，搞到我答到一舊舊咁。
 


點解佢地兩個會一齊出現？點解阿月會黎拜託我？佢唔係好憎我架咩？？
 
不過如果目的係搵阿日出黎既話我都可以合作既，畢竟如果唔解決呢件事既話就無辦法解鎖之後既事。
 
反正都要做個了斷，頭先仲煩緊點樣先搵到阿日，而家方法自己送到上門，唔係唔接受呀？
 
之但係我仲係有一個疑問…
 
我：「點解係我？」
 


大家都靜左落黎，你眼望我眼。
 
起初我以為會係晨哥打破呢個沉默既局面解釋呢一切，點知居然係阿月親自黎，有點出人意表。
 
月：「因為…唔係你既話佢應該就唔會出現，而家你係唯一可以刺激到佢既野…」
 
應該都係啦，佢由此至終既目標都係我，如果係我既話佢應該唔會放過呢個機會剷除我呢個障礙。
 
睇黎阿月都同我有相同既諗法，知道要令阿日現身就要用到我，只不過…
 


我：「俾你引到佢出黎既話你會點做？」
 
其實呢個先係我心目中最大既疑問，我唔知佢見到阿日之後會做d乜，分分鐘會掉轉槍頭對付我咪大獲。
 
「我會同佢離開香港，去其他地方繼續生活。」
 
…！？
 
我完全冇預計到佢會俾出呢個答案，以為最多只會係說服阿日叫佢唔好唔咁執著之類。
 
月：「之前俾左咁多麻煩你，真係好對唔住。我同呀哥始終都唔係家姐真正既屋企人，但想取而代之真係…仲傷害左咁多人…」
 
佢講講下就開始喊起上黎，我一時間都唔知應該點做先好，我好怕女仔係自己面前喊，佢地一喊我個人就會慌。
 
我唯一識做既野就只係默默遞上紙巾，等佢繼續釋放佢既情緒。


 
但係旁邊既晨哥睇左陣終於忍唔住沉默，選擇左企起身。
 
晨：「問題根本唔係呢度，你面前呢個人本來都唔係你家姐既屋企人架，重要既係心態既問題。」
 
心態既問題？佢又想講D乜？
 
晨：「屋企人呢樣野從來唔係靠血緣去連繫住，呢個世界上好多有血緣關係既人最後都反目成仇，所以最重要係講緊個心，只要大家愛住大家為彼此著想，就係屋企人。」
 
「你兩兄妹最大既問題就係出係佔有欲太強，想你地既家姐只屬於你地兩個，先會導致而家既局面，同時傷左你地家姐既心。」
 
「雖然呢件事上你家姐都有一定既責任，不過…哎你地咁聰明應該明白我意思既，所以唔需要太過在意於係咪真正屋企人呢件事啦，無乜意義。」
 
屋企人唔係靠血緣去連繫住…佢又講緊幾岩…
 


雖然我都唔係一開始就完全當Sarah佢地係屋企人，但而家…我已經變到無左佢地唔得，仲發過誓要保護好佢地。
 
當然二家姐都係範圍內啦，所以我願意為佢做任何野。
 
就算要同咩人合作我都唔介意。
 
抱住呢種決心，我企左起身面對眼前既阿月。
 
我：「我地合作啦，為左我地既屋企人，一定要帶佢地返黎。」
 
「我地既屋企人」指既並唔只係二家姐，仲有阿日。
 
既然二家姐認定佢係屋企既一員，咁我都會接受呢個細佬。
 
月：「我…嗯，多謝你。」


 
佢欲言又止，最後只係熱淚盈眶地講左一聲多謝。
 
不過咁已經夠啦，如果佢講埋d咩我唔配做你屋企人之類既說話我都唔知道應該點應對好。
 
係啦，呢個moment真係無需多言。
 
我：「但係…我地應該點做先可以搵到佢？」
 
晨：「啊呢個就簡單得多啦，阿月妹妹話阿日其實仲會睇自己send比佢既msg，我地只要從呢方面入手就可以，哈哈哈哈。」
 
「我要你拍一段片，話自己綁架左阿月妹妹，阿日咁緊張自己個妹，一定會出黎面對。」
 
唉我由見到佢奸笑個下已經知道肯定唔會係咩好主意，但而家都無其他更好既辦法，唯有咁啦。
 


係逼於無奈之下，我地三個總算拍左條片仲send埋比阿日，而家就只係等阿日復。
 
啊…係喎…
 
正當大家都收拾細軟既時候，我忽然有一個諗法，於是我轉身望住阿月。
 
我：「你…要唔要黎我地屋企坐下？」