《無啦啦多左幾個家姐同細妹Season 3》: 為了什麼

晨：「喂喂喂，做乜塊臉腫左既？俾邊個打？Ellen妹妹呀？」
 
屌，明明句野係慰問緊我，點解由佢把口講出黎咁有嘲諷既味道架，搞到我想打鑊佢。
 
唉唔好喇，一定唔夠打，不了不了，忍下吧喇。
 
我：「唔係，係Sarah。」
 
晨：「哦？哈哈哈哈居然係佢，估唔到喎真係，因為佢知道左你預左會死？不過如果係我，我都會打鳩你，往死裏打個隻打，咁無出息既說話都講得出仲唔打柒你。」
 


「放心，我由一開始就無諗住比你死，我會做好幾手準備保你安全，因為如果你死左，Miki姐同May姐都唔會放過我。」
 
我：「算啦，意外既野又有邊個可以保證到，總知我無野望，我只係希望件事可以真真正正告一段落，大家一齊返屋企，齊齊整整就可以。」
 
本來講完咁大段野想飲啖野休息下，點知杯都未拎起，額頭就已經被晨哥狠狠彈左一下，坐都坐唔穩，成個人撻左落地。
 
晨：「屌你真係煩撚到，話左唔會比你有事就唔會有事架啦，做咩你不斷諗自己會死啫，你係為左死先決定咁玩架咩？」
 
「與其不斷諗住自己會死，不如諗下點去避免呢個情況發生啦係咪先阿明哥仔？」
 


「你又有冇諗過如果你死左，你班女朋友會點呀？你以為咁做係為左佢地開心，又有無諗過出黎個結果會係點呀醒目仔？只係為左滿足自己既心願唔理下身邊人既感受，你坐住左個腦呀？」
 
「你有冇意識到自己打算做既野同自己起初既目的係完全相反呀天才？」
 
又好似有道理…算喇呢d都唔係重點，都係將重點放返係部署方面。
 
之後我同晨哥開始討論接下來既事，佢亦用左我電話send左幾個訊息比阿日，目的係再刺激佢多D。
 
話就話係討論，但其實大部分時間我都係聽到佢講解佢既安排，好似上大學lecture 咁。
 


大慨就係三日之後係一座工廠大廈同阿日見面，就係咁多。
 
不過我都搵到少少位可以入一入，問下自己想知既野，例如阿月既情況之類。
 
得到既回答就係無分別，仍然留係二家姐身邊，照顧二家姐既同時努力唔俾二家姐知道我地既計劃。
 
咁就好，如果俾二家姐知道的話肯定會阻止我地，我唔想咁。
 
晨：「嗯，大致上就係咁喇，你張電話咭我暫時收走，等我同佢whatsapp，你有冇問題？」
 
我：「唔洗，我自己可以處理。」
 
聽到我咁講晨哥都嚇左一跳，但佢諗左一陣之後笑左一笑，鬆一鬆膊，同意左我呢個決定。
 
晨：「唔好話我多事喇，返去同Sarah妹妹佢地道個歉喇，你嚇親佢地喇，好好同佢地傾一次，好冇？」


 
唔駛你講，我一定會。
 
畢竟佢地係我最鐘意既人啊，我居然只考慮到自己感受，忽視左佢地。
 
唉…如果比Anna知道既話，佢肯定會篤爆我額頭，分分鐘重手過晨哥添呀？咦…？電話響？
 
仆街真係日頭唔好講人…Anna居然係呢個時候打比我…
 
女朋友打黎總無可能唔聽架…？仲要係Anna…唯有聽囉…
 
㩒左接聽掣都未夠一秒，電話就已經傳黎Anna既咆哮。
 
Anna：「陳煒明你個衰人又做左D咩衰野呀！！夠膽整喊Sarah同Yui？」
 


大鑊…始終都比Anna知道左…
 
我：「唔係..件事唔係你諗既咁，你冷靜啲聽我解釋先…」
 
Anna：「好吖你解釋吖，解釋下點解你想死呀！」
 
我：「我無話過想死…我只係話可能會有事啫…好人好者無啦啦點會想死先得架…」
 
Anna：「嗱我唔理呀，我唔准你有事，如果你有咩事我會即刻飛返黎打死你！你知唔知！你仲要同我氹返Sarah同Yui呀！！」
 
我：「咁有d強人所…」
 
Anna：「你講咩話！？我聽得唔係好清楚喎！」
 
我：「無！我話無問題！而家即刻去做！」


 
嘩真係見隔住個電話都感受到Anna握緊左拳頭…成個畫面出哂黎…
 
Anna：「嗯知道就得喇，唔講咁多啦我呢邊都仲有野要做。」
 
「萬事小心，有咩即刻打比我喇。」
 
我：「嗯，你都係。」
 
久違而又短暫既通話就此結束，總令人覺得可惜又想再三回味。
 
Anna把聲…真係好耐無聽過…突然聽到佢把聲，個心即刻舒服左唔少。
 
好喇都唔好浪費時間，快啲返去氹返Sarah佢地。
 


無諗到仲整喊左Yui，唉我真係仆街黎…
 
一邊諗住點樣氹返佢地，一邊坐的士，話咁快就返到屋企門口。
 
我企係門口，遲遲都唔敢入去，因為我仲未諗到一個好方法去氹得返佢地，畢竟今次真係太過火。
 
拖下拖下，屋企既大門居然自己打開左，我有一刻仲以為屋企換左自動門，直至見到老母慢慢行出黎。
 
媽：「喂快D入去啦，佢地唔開心左成日架啦，你又走鬼左去，都唔知你個腦諗乜。」
 
我：「呃…好…」
 
估唔到連老母都開聲話我…明明呢幾年佢都無乜點理事我，今次真係over左…
 
每行一步，心入面既愧疚就重一分，行到Sarah房門囗既時候已經抬唔起頭。
 
但最後我都係鼓起僅存既一絲勇氣，推開門行入去。
 
我：「我返黎啦。」