(嚴重FF愛情輕鬆同居故）《我與貓系女室友的二三事》: Ch.4

同Man同居咗幾日，我發現佢非常神秘。聽呀妹講佢外國回流返香港，但我好少見佢走出房門，係我返工嘅時間都唔知佢有無出去搵工。

後尾同呀妹傾計得知，原來呀Man係一個好出名嘅畫家同插畫家，經常係屋企畫畫所以唔會點出街。

咁就仆街啦！

個膠Mary仲係屋企，無理由等Mary陳屍係屋企等佢發臭嫁。我一定要掉返個Mary比家強嫁嘛！

同呀Man同住咗一星期，我哋好少碰面，每日我返工放工佢都係喺房裡面，有時OT到好夜返到屋企見到佢沖杯麵或者見到佢走去廁所，我同佢講過嘅說話應該都無廿句。有關佢嘅一切我都唔了解。



星期日朝早我走咗去廚房煮早餐，當我整好拎出廳嗰陣咁啱見到Man係房走咗出嚟，佢眼定定咁望住我放係枱面嘅沙嗲牛肉麵。

「妳好，早晨。」

「⋯⋯」

「妳食咗早餐未？」

「⋯⋯」



「我煮埋妳個份一唔一齊食？」我客套咁問。

原本一直望住我無反應嘅佢，對眼忽然發出閃光。佢立刻走到餐檯前坐低食嘢。

我哋一直無對話，忽然佢抬起頭望住我好認真咁同我講：「下次，我想要杯牛奶同想食煎蛋。」

我呆咗咁望住佢，邊有人咁厚面皮叫人幫佢準備早餐，佢意思好似打算一直要我準備咁。

當相處耐左，望住佢一頭黑色長髮，一身健康膚色甚至凹凸有致嘅身材，都令我覺得佢唔單只神秘仲好傲嬌，就好似一隻黑色流浪貓咁。



我煮多一碗麵拎出廳，見到佢仲未食等埋我一齊食。當我坐低後，佢就立即拎起雙筷，食得津津有味。明明只係一碗普通嘅沙嗲牛肉麵，但佢食到好似米芝蓮美食咁。

見Man食到咁滋味，我嘴角不自覺咁向上翹起。佢食完麵甚至捧起碗飲湯，飲完湯後放低碗伸手拎咗張紙巾抹一抹嘴。

當Man發現我一直注視住佢，佢塊面開始變紅。

「你⋯⋯煮得好好食。」Man望住我以好認真嘅語氣講。

我無諗過會有人讚我煮野好食，而且見到Man佢咁認真令我忍唔住笑起上嚟。煮嘢食成為咗一個契機，令到我同Man close 咗。其實所謂colse只喺每日朝早都會一齊食早餐，食完早餐之後佢都會幫手洗碗。雖然Man佢依舊好cool，但係佢表情明顯比之前柔和好多。

之後每日朝早，星期六日嘅夜晚放假係屋企我都會煮早餐或叫外賣，每一次都會同Man一齊食飯。

* * *

又一個OT嘅晚上，趕完圖後我伸一伸懶腰，望一望手錶時間。原來已經夜晚十點，不過做得呢一行就預咗一定會OT，呢幾年都已經習慣麻木咗，好似已經將OT視為理所當然咁。



我望一望四周其他同事已經收咗工，又係我最後一個離開公司。一落到大堂看更見到我就打招呼：「黃生，今日又OT呀？每次都係你最後走。」

「日日都OT，女朋友唔會話你咩。」

「係呀⋯⋯哈哈。」我有啲尷尬咁笑。我無答看更問題就笑住向門外走去。

女朋友都要有時間先識到嫁，做呢行經常OT，公司大多數都係男人，女嘅唔係結咗婚，就已經有男朋友。

忽然電話響起嚟，我一望到個電話來電顯示，就立即電話：「元家強！你條友失咗蹤咁多日去咗邊呀！whatsapp完全唔覆我。」

元家強聽到我係咁鬧佢，佢立即安慰我：「巴打！冷靜啲。我慢慢解釋你聽。你宜家得唔得閒呀？不如我哋去飲返杯，去曹念華返工間酒吧見。」