(嚴重FF愛情輕鬆同居故）《我與貓系女室友的二三事》: Ch.10

「點解會有隻貓喺到嘅？」呀Man伸手摸咗摸黑貓。

「我返嚟嗰陣係垃圾桶附近見到佢濕哂咪執咗佢返嚟囉。」黑貓舔左舔呀Man隻手。

「佢好似好肚餓好口渴咁。」呀Man去廚房拎咗個碗放咗啲水然後放到黑貓面前。

黑貓真係好口渴係咁飲水。

「佢會唔會肚餓嫁？但有咩可以比佢食吓？」呀Man問。



「我都唔知呀，我唔敢亂比嘢食佢呀。」有時睇facebook都見到啲post講啲人亂比寵物食嘢，搞到寵物中毒或者影響佢地健康。

「妳有無養過動物嫁？」

「我無呀，但係我細個嗰陣就好想養。」

我同Man一齊上網搵資料，搵有關貓可以食咩。最後發現屋企雪櫃有啲雞胸肉，就拎咗去加水煮。

另外我都煮咗兩碗烏冬，拎咗出廳。



係咁多燭光下，兩個人坐係地下食烏冬個畫面都幾好笑。

當我將雞胸肉遞到黑貓面前，佢立即喵一面伸個頭埋去碗到食，仲食到四圍都係。

見佢咁精神，仲願意食嘢我都放心啲，因為啱啱一直好驚佢捱唔到，宜家附近獸醫診所又收哂舖，要等到聽日先開。

「佢真係好肚餓咁喎。」見到佢食得咁滋味，我都開始食碗牛肉烏冬。

「Gary⋯⋯你諗住點處理隻貓呀？」



「無呀⋯⋯我諗住聽日帶佢去睇獸醫，之後上網搵貓義工交比佢哋。」突然我聽唔到任何回應，我轉過頭一望，只見到Man捧住碗烏冬，一面期待嘅眼神望住我。

「妳⋯⋯想養佢？」

聽到我咁問，佢即刻係咁點頭。

「我一直想養貓好耐嫁啦，但係因為養母唔鍾意，所以一直都無提出過。」

佢一直望住黑貓然後講：「我會做一個好主人，唔會拋棄隻貓嫁。定係⋯⋯屋企唔比養寵物呀？」

見佢個樣咁失望，我都有啲唔忍心：「都唔係嘅⋯⋯但係我同妳都無養貓經驗，可能要上網搵多啲資料。」

聽到我嘅說話，呀Man好開心佢不自覺伸手搭上我手臂講：「真係嫁！多謝你呀！」

我從未見過呀Man笑得咁開心，原來佢露出笑容個樣都幾甜，都唔係咁cool。



「咁我哋不如幫佢改名先？」

「不如叫⋯⋯黑媽媽？」

呀Man聽到呢個名即刻笑咗出嚟。

「哈哈，你改個名好奇怪呀。不如改佢個名做芝麻糊好無呀？」

「好呀，就叫芝麻糊啦。」

呀Man摸咗摸芝麻糊然後講：「芝麻糊唔使驚嫁，我哋聽日會同你去睇醫生。」

我望住呀Man只見佢露出溫柔嘅表情。呢個表情我從來都無見過。



我同呀Man坐係客廳一直傾計傾到半夜，直到停咗雨先各自返房瞓覺。