[校園][純愛]《幸運星下的預言》: 第五章

之後我就跟佢地去下面嗰個班房啦

一入到去就見到好多人已經坐咗喺度

大約十幾個到囉

有男有女

我都冇乜點留意有冇邊個特別靚，



入到去搵位坐低就算

跟住就見到我地嗰個主席扮晒大支野

喺度周圍講啦

又話呢樣嗰樣，

講到好似贏梗咁樣



跟住有班我唔知係真心膠定係假膠啦

竟然喺度附和佢

係咁話主席好野，主席冇得頂

我地個主席要面

聽到佢地講啲咁嘅野梗係爽死啦



個樣衰到呢

老實講我真係好想笑

不過你知啦，

我入到去都係負責打醬油

又唔係做大嘅咁就唔落佢面啦

一陣我俾人屌死

安頓好之後就睇下有邊個女同學有份入

有幾個都唔錯喎



好多都係同一級

總算個廢柴主席冇鳩噏

真係有女唔係純粹水我入嚟

不過就唔係好熟

唔緊要嘅，

靠呢啲濕鳩學生會好易就玩得埋

完全唔覺得係一個難度，



跟住佢地開始講每人嘅崗位

好彩一早同佢講

叫佢求其俾啲野我做就可以

千祈唔好俾啲重要野，

我入嚟hea下玩下嘅啫

越容易就越好

好彩佢話得，

重要串返我喎



放心啦重要野梗係唔俾你做啦

屌佢丫使唔使咁串嘴

算數你係大佬，

我冇得出聲一定係你啱晒

跟住條撚樣公器私用，

特登揀佢鍾意嗰個女仔做副主席

咁就名正言順同佢一齊拼搏



順便增進感情

唔知個女仔知唔知呢條友立心不良呢

不過依家諗落都正常嘅，

調返轉我係佢我都會咁做哈哈。

大約傾咗個幾鐘，

終於都傾好晒每個人要做啲乜野

有啲之前冇提過係邊個就唔講啦，

費事講咁多人你地亂晒唔知邊個打邊個

映彤就梗係要提啦哈哈，

即使佢已經係人地嘅女朋友都好

始終都係會有意無意咁樣去望住佢

見佢就嚟望返過嚟我呢邊就即刻移開視線，

佢應該唔會發現嘅

熱戀中嘅情侶，

眼入面當然只係得對方啦，

點會有時間有心機去理其他無聊人啫

又或者咁樣去偷望佢已經變咗係一個習慣，

以前同佢同班嗰陣就梗係喺班房望佢啦

即使有時係近如坐隔離都好，

唔知點解個視線都重係停留喺佢身上

去到唔同班嘅時候，

你知啦中學雞會有嗰啲講座架嘛，

全級都會喺禮堂嗰度坐定定，

我做嘅野同我以前坐喺佢隔離嘅時候，

一樣冇分別

可能我都係睇得戲多，

覺得咁樣望住好撚型

咁就有樣學樣，

不過以前嘅我從來都唔知，

戲入面係男主角咁樣做，

不過現實上我自己唔係

只係我以為我係啫

唔係都唔緊要，

最可悲係自己以為自己係

直至到佢拍拖嗰陣我先至驚醒，

唔好諗咁多啦傻仔

好在，

後知後覺都好過不知不覺，

冇繼續催眠自己

依家我偷望佢，

只係因為我唔能夠光明正大咁樣望住佢

我更加可以肆無忌憚咁樣偷望添

唔係我大膽咗，

只係佢根本唔會留意到坐佢對面嘅一個無謂人

所以我先放膽啫，

有時我都唔明白自己，

究竟我自己係放唔低，

定其實只係變咗一個習慣

佢喺度就偷望佢啦咁樣，

證明我都好唔了解我自己，

連一條咁簡單嘅問題都答唔到

我又唔可以同人講喎，

呢啲野點講得出口，

其他人又點會知我諗乜，

所以都係唔理咁多啦，

盞自己拎嚟煩

講咗咁耐都未講佢做咩崗位

映彤同埋佢男朋友係做宣傳

佢話佢兩個知名度高喎

人又nice樣亦都唔錯

梗係做外交嗰範

至於我做乜

去到最後原來係做文書

當然亦都係因為太多人嘅關係，

所以唔止我一個人做呢個位

重有另一個女仔一齊做

而嗰個女仔，

就係叫做筱瑜。