[校園][純愛]《幸運星下的預言》: 第七章

好快就去到投票日

記得嗰日早會話，

由朝早九點去到晏晝四點係投票嘅時間

講下所謂嘅對手先

嗰年好少團隊參選



計埋我嗰隊騎呢隊得三隊人玩

其中有一隊聽聞校長唔多鍾意

話佢地啲行為舉止過於走上潮流嘅尖端喎

簡單講即係太前衛

同埋嗰日個問答大會表現得唔好



個主席俾人辣㷫咗，

公然喺個台屌人

其實屌人都唔係問題，

最弊佢講咗粗口

重要夾硬兜喎



真係十級尷尬

諗返起都打冷震

我呢啲唔使出去講野，

上到去淨係負責坐喺度

梗係望住校長個樣啦

係咁耍手擰頭

一睇就知輸咗啦

所以基本上係得兩隊喺度鬥啫



返到去班房，

聽到好多人都有講今年投邊個學生會

出奇地原來好多人支持我嗰組，

當然唔係因為我啦哈哈

跟住就梗係即刻扮聽書

但係其實個專注力集中喺耳仔嗰度

偷聽佢地講乜先，



原來佢地話我嗰組好多靚女

有講筱瑜

映彤都有提

其實仲有提多幾個靚女嘅

不過唔係重要角色咁就費事講咁多啦

費事你地搞到一頭煙，

跟住先發覺主席條撚樣真係好撚醒

一方面就借啲意，



溝佢想溝嗰個女仔

另一方面又叫一班靚女入嚟，

呃班男同學例如好似我呢啲傻仔咁入嚟

順便吸埋啲票

一舉三得

睇唔出條友咁醒

望落去都係鳩下鳩下咁樣，



人真係不可以貌相

就嚟小息嗰陣，

主席行咗過嚟叫我一齊落去

佢話想集齊咁多個人一齊喺下面，

我心諗人多有撚用咩

票多先有用丫嘛，

當然梗係冇咁樣同佢講

做細嘅點可以當面屌大佬，

如果遲啲真係當選到我重要靠佢

所以都係死死氣跟佢落咗去。

我見到我地有唔少人真係好緊張

如果我做到漠不關心咁樣，

咁就肯定出唔到去個班房

主席一定call齊馬吊起我嚟打

所以我都要扮到緊張啦哈哈

其他人望落去真係唔似扮

如果真係扮嘅話，

咁就注定佢地天生食演員呢一行飯

講下講下都好快去到四點，

咁就要開始點票

學校就安排三組人上返去禮堂上面，

嗰陣我就坐喺筱瑜隔離

因為要跟返崗位坐

唔係講笑佢真係好靜

你唔撩佢話佢真係可以唔講野

好彩佢冇口臭呢個問題

你知啦唔好話男仔定女仔，

呢個問題真係好困擾

講真對我嚟講樣呀其他野真係唔係重點，

同我相處嗰啲人最緊要係千祈唔好口臭

有嘅話幾靚都係假

筱瑜冇呢個問題對我嚟講已經係贏咗

講起上嚟唔止個口，

佢成個人都好香

當然應該係佢啲冷衫呀校裙啦

我點會無啦啦聞佢咁鬼變態，

不過成日都講第一印象真係好緊要

一個人有香味已經加咗好多分

最怕嗰啲整色整水但係效果唔好嗰啲呢

有啲聞起上嚟真係好撚刺鼻

筱瑜嗰種係好自然而且唔會太濃

掂呀

掛住講佢添，

最後點票點咗半個鐘左右

我地大比數拋離，

正式成為今屆學生會

跟住先諗起係喎我係學生會咁咪可以為所欲為

即係嗰啲乜鬼野班際比賽呢

喺度自定規矩呀呢樣嗰樣

都唔係完全冇好處嘅

跟住再望一望坐我前面嘅映彤，

佢又係嗰啲表情擺喺個樣度嘅人

見佢笑到隻眼連成一線就知佢係好撚開心

喺我隔離嘅筱瑜都係冇乜表情

係有個女仔擰轉頭同佢講，

「我地贏咗呀」

佢先俾返個微笑人

證明佢同我係一樣，

都係俾人逼入嚟

唔係好熱衷，

你諗下我同佢做同一個位，

如果一個好投入，

另一個好似我咁樣hea到出面

估都估到會有衝突啦

好彩依家唔係咁樣啫。