[校園][純愛]《幸運星下的預言》: 第十九章

人與人之間嘅關係的而且確好奇怪

好多時發生嘅野真係意想不到

就好似我幾個月前，

都諗唔到會有一日同筱瑜熟絡起嚟

經過嗰晚食飯之後，



我同佢個關係簡直係幾何級數提升

咁樣講或者係誇張咗少少

都係舉啲例子出嚟算數

依家嘅lunch time，

如果我入去個學生會室先過佢，



佢一坐低就會同我傾計

多數都係吹下水講下廢話

中學生係咁架啦屌

唔通喺度講人生哲理咩

起碼我冇咁高層次先



筱瑜:「壞學生抄功課」

我:「屌你啦你唔抄嘅」

筱瑜:「哈哈真係唔抄喎」

我:「冇可能肯定係鳩吹」

筱瑜:「唔信你問下映彤佢地」

冇幾耐映彤真係嚟咗

我:「喂，

佢係咪唔抄功課架」



映彤:「梗係啦

如果佢抄我地就大鑊

多得筱瑜咋」

我:「點解佢抄你地就會大鑊呢」

映彤:「我地好多都係抄佢

你諗下如果佢都要抄，

收簿嗰陣邊夠時間抄得切」



筱瑜:「講咗你又唔信」

我:「中學生點會唔抄功課」

筱瑜:「見識少」

映彤:「個個似你咩

抄功課」

我:「得喇你兩個唔使唱雙簧

好撚忙丫依家」




抄抄下嗰陣，

筱瑜無啦啦敲我張枱

我:「做咩呀」

筱瑜:「有冇食lunch呀你」

我:「你見我咁早嚟梗係冇啦

依家抄唔晒要留堂呀仆街」

筱瑜:「咁呀，

飮包野頂住個肚先啦」



跟住佢就遞咗包朱古力奶俾我

我:「飲筒呢」

筱瑜:「嗱」

呢個可能係我同佢之間嘅獨有互動

朱古力奶同埋飲筒永遠都係分開俾

我好相信每一個人都會同某個人之間有獨有互動，

睇下係邊個啫，

依家我用過來人身份話返俾你知，

太多嘅互動反而係唔好

依家唔會明白我點解咁講，

總之他日桃花依舊，人面全非之時，

多一個片段就等於多一把刀插入你心臟

重要唔拔出嚟，

嗰種唔係令你大吵大嚷嘅痛，

反而係由心入面慢慢滲出嚟，

咁先到肉

唔好意思又講多咗，

我:「醒咗喎

依家識買定朱古力奶」

筱瑜:「你有邊日冇飮

唔阻你走先」

我:「等陣先

俾返幾蚊你」

筱瑜:「俾多一蚊」

我:「點解呀」

筱瑜:「飲筒囉」

我:「你唔好去搶」

筱瑜:「咁你俾唔俾呀」

我:「一蚊啫係咪呀

當係人工你拎住」

俾完佢我就耷低頭繼續抄

跟住我個頭上面無啦啦有個一蚊跌落嚟

初頭我淨係feel到有啲野喺我個頭度，

跌落嚟先至係一蚊

筱瑜:「講笑咋

慢慢抄啦拜拜」

我:「好無聊呀

拜拜」

可能你地覺得，

唔係呀話咁就叫幾何級數提升，

不過對於置身其中嘅我嚟講，

的而且確冇誇張

以前佢唔會咁樣同我傾計，

就算傾都係一句起兩句止，

更加唔會無啦啦買朱古力奶上嚟，

咁當然啦我冇咁兒戲，

當時只係覺得佢係一個啱傾嘅女仔啫，

未去到迷戀嘅地步，

或者，

應該一直維持呢個距離就算數

當然人類總要喺經歷入面學習，

得與失其實唔係從表面就可以睇晒，

唔係想喺度講埋啲老到甩牙嘅道理，

純粹係有感而發啫。