[校園][純愛]《幸運星下的預言》: 第五十三章

等下等下終於等到野食

成班都知餓狗搶屎咁

唔講以為啱啱放監

係咁食係咁食

佢地都係叫啲大路野食啦



pizza炸雞唔少得啦

重有幾樣就唔記得咗，

因為嗰幾樣我唔係好鍾意食

食食下我想食多舊pizza

好食唔死側邊好多人



咁我就攝唔到入去

咁算啦唔緊要，

食第二樣都得嘅啫

又唔使一定食佢

突然間見到有條友行過嚟拎塊pizza俾我



嗰陣我食緊第二樣野所以頭耷耷咁，

一抬高頭就見到有個人

講得出嚟重有邊個丫

筱瑜:「攞唔到呢」

我:「嘩唔該晒喎」

筱瑜:「見你喺側邊側側膊咁樣都知你想點啦」

我:「你都痴線講到側側膊

硬係要加啲咁陰濕嘅形容詞」



筱瑜:「都係一樣啫

咁你食唔食丫」

我:「重使講梗係食啦」

小弟實在太鍾意食pizza

我成日同人講，

我食pizza個量詞唔係用「件」嘅

而係用「盒」嘅



我有同過筱瑜講不過佢唔信

去到今日佢終於知我真係好撚鍾意食

筱瑜:「真係好鍾意食喎

見你係咁食」

我:「痴線我點解要呃你」

筱瑜:「重有喎你食唔食呀」

我:「幫幫手唔該晒」

筱瑜:「拎過嚟丫嘛係咪呀」



我:「幾時都話你最撚醒目」

筱瑜:「第一日識你咩

不過有條件喎」

我:「咩條件」

筱瑜:「幫我食青瓜丫

我麻麻地呀哈哈」

我:「屌原來咁簡單



你一陣拎過嚟夾俾我咪得囉」

筱瑜:「好

抹嘴啦成個嘴都係啲汁喇」

講到呢度一定以為好似電視劇咁樣

女主角幫男主角抹，

冇

你地實在睇戲睇得太多

邊有發生喺我身上，

再加上嗰陣我地關係未去到咁深入(自己覺得)

都係我自己抹返啫

我:「唔該晒」


食下食下，

主席條戇鳩仔無啦啦話有啲野想講

成班梗係擦鞋

「主席好波」

「主席犀利」

咁究竟主席講乜呢

大致上就係話冇諗過成班人咁團結

初初其實都係搏搏下嘅心態去參選

冇諗到咁長遠，

都係一路做一路學

見招拆招咁樣

估唔到去到今日全部人都守規律

有會要開一定會到齊

需要交嘅野都交足

頂佢個肺淨係多謝筱瑜

喂大佬我都係文書

雖然唔係主力嗰個啫

咁都叫做有幫手丫

筱瑜重要即刻望返住我陰陰嘴笑咁樣

攞景定係贈慶

跟住主席又話好多謝咁多位一直咁上心

都知各位承受唔少壓力，

我心諗有冇咁誇張呀

又唔係講到上莊

都係中學學生會啫

屌佢講到差啲流馬尿咁樣

不過算佢係大我係細，

呢個時候梗係冇出聲抽佢水

串人都要講時機架嘛

不過關於呢樣其實我都有少少個人情感

當係廢話咁樣聽下

坦白講初初真係唔係好鍾意做，

因為佢叫我入去我先入去

喺發覺做落去又唔係真係咁難

比起以前識咗唔少朋友

唔好理佢係真心定係酒肉先，

起碼有個照應

抄功課好出貓又好點都搵到個同盟

同埋，

如果我冇玩學生會，

我諗日後回想起中學生涯嘅時候，

真係一個字都講唔到

甚至時空錯亂

邊年打邊年完全唔記得，

好似冇真正活過咁樣

我已經唔講係咪不留痕跡喇

我淨係講自己腦入面嘅回憶，

分分鐘真係一句都講唔到

至少依家我可以同佢講，

中六嗰年我有玩過學生會

做過啲乜玩嗰啲乜點樣點樣，

最緊要嘅，

係我因為咁樣而識咗一個女仔

我唔劇透，

去評論呢件事係好與壞

我只係想講，

即使結果點樣都好，

豐富咗我嘅閱曆

呢一點係毋庸置疑。