[校園][純愛]《幸運星下的預言》: 第五十五章

冇幾耐終於見到個商場

終於捱完呢條凍冰冰嘅街道

咁就二話不說衝咗入去食糖水

筱瑜:「食咩呀」

我:「番薯糖水



學你話齋咁撚凍一定要食熱野」

筱瑜:「好

唔該兩碗番薯糖水丫」

老闆娘:「收到靚女」

喺等緊野食嚟嘅時候，



佢無啦啦講起頭先主席講嗰啲野

筱瑜:「你有冇聽頭先主席講咩呀」

我:「有呀做咩」

筱瑜:「估唔到成班人真係咁團結喎」

我:「你咁講即係原本估唔到



黑心到你丫」

筱瑜:「你先黑心呀

講一句野都諗咁多」

我:「我都係照字面意思推斷啫

又係你咁講嘅」

筱瑜:「唔好講住呢啲先喇

我有冇同你講過我初初都係聽映彤講先入嚟」

我:「好似有好似冇



唔緊要啦有時間就講埋啦」

筱瑜:「原本呢以為諗住全部都係玩玩下

得就得唔得咪算囉，

哈哈原來唔係喎

副主席有同我講，

佢自己都估唔到開會咁齊人」

我:「你又唔好諗到咁衰



齊人都好正常啫」

筱瑜:「唔怪得主席頭先咁樣講

其實佢兩個都好辛苦架」

我:「佢兩個即係主席同埋邊個」

筱瑜:「副主席囉

聽映彤講要做好多野

唔係睇咁輕鬆」

我:「係咩



我唔理佢呀關我叉事咩

我最關心就係可以去學生會室嗰度抄功課

呢個就係最大得著」

筱瑜:「冇喇咩得咁多咋」

我:「識到你囉算唔算呀」

筱瑜:「又講呢樣

好煩呀」



我:「痴線真心就當我煩膠」

筱瑜:「咁我都好多得著嘅

有個室可以靜靜地咁樣做功課啦，

識到呢個識到嗰個乜乜物物

同埋識到一個好鍾意飲朱古力奶嘅人囉」

我:「係咩

係咪好靚仔呀」

筱瑜:「佢份人好自大架

又好鍾意亂咁噏喎

啱啱先扮完武士

你知唔知佢邊個呀」

我:「照你咁講呢個人絕非凡品

係囉邊個嚟架」

筱瑜:「唔知呀

你見到幫我同佢講呀

好開心今年識到佢，

明明有時會好型

不過平時得把口講埋啲衰野

懶懶閒咁樣，

其實好多野都緊張到死

特別係A-Level呀

你叫佢放心啦我知佢唔鍾意俾人踢爆」


真係冇野呃到佢，

嗰陣嘅我真係好緊張A-Level

冇期望拎到咩分，

淨係想入到u啫

哈哈點解咁想

咪就係細細個下巴輕輕應承咗老母囉

我老母從來冇俾壓力我

玩乜做乜都係採取自由態度，

當然真係做啲危險嘅野咁就即刻出嚟阻止

慶幸我自己都唔係完全唔自律

父母對於讀書時期嘅仔女，

最緊張都係有冇入歧途同埋肯唔肯溫書啫

咁我呢兩樣都冇乜問題

我呢條咁嘅友，

學咩人入歧途丫

毒撚一個

成績唔算標青不過都唔係話差

中規中矩咁囉

正正因為我咁樣，

所以父母唔會特別去監管

佢都明白咁大個仔唔會再好似細個咁黐身

不過佢冇俾壓力我啫

我就好記得當年我同老母講過啲乜

我有同佢講過一定要入大學

嗰陣學位貶值問題好似冇咁嚴重

好似咋哈哈

調返轉講可能佢今日都唔記得

但呢句說話喺我腦海足足超過十年

有邊個唔想望子成龍丫

佢兩個唔俾壓力我唔代表唔想

可能只係驚對我造成好大壓力所以先咁樣啫，

自己知自己事

從來都唔係所謂嘅天才

要我喺某方面脫穎而出就真係好難，

只不過，

今次呢樣目標又唔係真係咁遙不可及

再加上又係我自己衝口而出，

點都要做返一次男人

講得出就要做得到，

得把口講有邊個唔識

我:「係咩

咁我幫你同佢講囉

糖水嚟喇

食啦」