[校園][純愛]《幸運星下的預言》: 第一百二十一章
去到商場之後就打俾眏彤
眏彤:「你上嚟二樓啦
跟住你就見到我架喇
我就喺佢地對面，
佢地依家背住我
」我:「依家嚟
」我同筱瑜成日去呢個商場
未拍拖嗰陣已經係，
估唔到今日成為咗對我嚟講最殘酷嘅現場
心情真係好矛盾
一路行上去嗰陣，
同時間又想掉頭落返去
我冇諗過行前對我嚟講係咁困難
細個學行路跌咗落地下，
咪再起返身
依家唔係呀，
我好驚跌咗落地下，
唔識點樣起返身
最慘我又好想知道個真相
更加想佢同我講呢個只係朋友
乜事都冇發生過
即使係大話都好
反正唔嚟都嚟咗，
冇理由呢一刻先放棄
我仍然都相信自己嘅女朋友
一上到去就見到眏彤
我:「筱瑜呢
」眏彤:「佢地喺對面呀
」跟住一望過去，
我見到佢兩個攬住
筱瑜個頭放咗喺個男仔嘅膊頭上面
曾幾何時，
我以為得自己個膊頭先至有呢一個福利
我以為佢只會將個頭放喺我個膊頭上面，
我甚至以為呢個角色只係得我可以擔當
眼前嘅一幕，
將我所有嘅以為全部批死
而且好有說服力
原來一直以嚟都係自己幻想，
你覺得係咁唔代表人地有同樣睇法
其實人地一直都搵緊另一個膊頭慰藉自己
或者，
我冇一直維持落去嘅福份
我同自己講，
一定要抑壓住情緒
保持冷靜行過去
聽埋佢最後抗辯，
我冇諗過，
佢會令我嘗試一下鼻頭好酸嘅感覺
不過，
今次真係講唔到多謝。
跟住眏彤陪我一齊行過去
筱瑜可能聽到聲，
於是就擰轉頭
一見到我行緊過去就好驚訝
嗰陣我扮作冷靜
我唔想喊苦喊忽
至少喺佢面前
我:「你唔係喺屋企整緊野咩
咁快嚟咗呢度嘅
唔使溫書咩
」個男仔:「呢個就係你男朋友
」筱瑜:「傑仔等一陣聽我解釋先
」我:「我都想知你有咩解釋
我嚟咗呢度幾耐
你地就攬咗幾耐，
你都未答我點解咁快出到嚟
唔怪得頭先咁快收線啦
」個男仔:「做咩呀你依家
審犯咁樣
」筱瑜:「呀文
等我講好冇
」原來嗰個男仔叫呀文
我:「呢個就係你嗰個青梅竹馬
」呀文:「係呀
我識咗佢十幾年
」我:「你知唔知我幾戇居
嗰陣信咗你，
以為你同佢真係冇野
」我冇理到嗰個呀文
一心一意淨係望住眼前嘅筱瑜，
我好清楚，
我同佢一齊嘅時間正踏入倒數階段
就算佢做咗咩都好，
我都要珍惜僅餘嘅時間
趁我未轉身之前
筱瑜:「er
好對唔住呀傑仔，
我知今次係我唔啱
」我:「哈哈
你邊有錯啫
你從來都冇錯，
都係我衰囉係咪先
如果我成熟啲你係咪唔會走
」筱瑜:「對唔住呀
」我:「你唔好覺得我真係傻先得啦
最近幾個禮拜問心你對我嘅態度有冇唔同咗，
心照啦
約你去邊又唔出，
好喇出到嚟又冇野講
以前講埋啲濕鳩笑話例牌都俾反應
最近呢，
你知唔知我以為係自己問題
」筱瑜:「唔係呀唔係你嘅問題
係我嘅問題呀
」我:「我喺度諗
自己係咪真係唔成熟
我知你好緊張考試，
個個人講要溫oral我都唔信
唔係呀話邊度使溫
你講我就一定信
因為我知你好重視自己學業，
原來我都唔係好了解你
咁假嘅大話都信
」筱瑜:「對唔住呀
因為你同佢好似，
嗰陣佢又有女朋友
所以
」我:「即係我係水泡
」筱瑜:「真係好對唔住
」我:「係定唔係
唔爭在講埋啦，
唔好同我講依家唔夠膽講呀
我唔信呀
」筱瑜:「係
」我:「ok
可唔可以講埋幾時開始
我想第日回味呢段初戀嘅時候，
個腦會更加多片段
唔想淨係記住你嘅好
」筱瑜:「一個月左右啦
」我:「你都犀利呃咗一兩個月
定係我太戇鳩呢
」筱瑜:「我知係我問題
唔應該當你係水泡，
你信我丫初頭真係有鍾意過你
真架
」我:「冇用架
你所謂嘅鍾意我，
都係因為你覺得我似佢啫
」筱瑜:「唔係呀
」我:「後尾唔鍾意我就係因為佢單身
咁你都話唔係
」筱瑜冇再出聲，
淨係一味耷低個頭
我連令佢流淚嘅資格都冇
原來由頭到尾都係我一廂情願
哈哈，
呀文:「傑仔呀可
其實呢都唔止一個月架喇，
我地夜晚成日都講電話
咁你依家知點解佢夜晚唔搵你啦
筱瑜都算唔話得
有時夜晚要同你出街，
佢嗰晚就唔會打俾我
」跟住映彤就出聲
映彤:「哦，
咁係咪想講你地好有規矩呀
即係話你地好尊重傑仔喇喎
」筱瑜:「對唔住呀
」跟住一睇佢條頸
原來重戴住我送俾佢嗰條頸鏈
我:「你放心
我點樣都唔會收返條鏈
你可以慢慢戴，
就算你唔鍾意都唔使俾返我
扔落海又好送俾人都好
」筱瑜:「係我問題
唔好意思
」我知我自己就嚟忍唔住，
所以借勢同佢道別
我:「唔使唔好意思呀冇人有問題呀
係我心甘情願做水泡，
又係我自作多情以為可以同你長相廝守啫
好明顯呢個位唔係我
」筱瑜:「對唔住
」我:「得喇你講咗好多次喇，
真係唔使講對唔住
你兩個開心啲啦
我走喇，
差一個月就一年，
依家咪幾好唔使嘥錢買紀念品
你知啦年年買就好貴
多謝你幫我慳返一筆
以後都唔使買
」於是我就擰轉頭走人，
我已經輸到一敗塗地
我唔可以再喺佢面前流一滴眼淚
係咁嘅話我就連少少尊嚴都冇埋
一定要扮灑脫，
初戀，
咁就結束了。
到死一天都會刻骨的記得這一課