[校園][純愛]《幸運星下的預言》: 第一百二十四章

第二日約埋呀澤一齊去酒店

係呀，

嗰年我地喺酒店搞謝師宴

唔好話我話

睇死好多囡囡一定著到戰鬥格咁樣



我同呀澤去緊嗰程全部都係講呢個話題

咁你明白點解我唔同映彤去啦

一嚟唔想阻住佢同埋Felix

第二就係邊傾得呢啲話題

講下講下，



好快就入到場

跟住我同佢就去返各自班別坐低

原來早咗到咁唔緊要啦

去後面拎住野飲先

順便睇下啲囡囡點樣著



冇幾耐就見到映彤佢兩個

雖然佢地唔同班不過照樣行過嚟

Felix:「溝死女啦」

我:「冇你咁靚仔」

映彤:「話咗呢件襯你啦

唔係我你食得屎呀」

我:「最撚把炮就係你

得未丫」



跟住miss唔知喺邊度行出嚟

miss:「好地地又要講粗口嘅

一陣同我講多謝唔好加粗口呀」

我:「對唔住對唔住

講真丫，

真係多謝miss七年教誨」

miss:「你扮野啦邊有七年



中一我都唔識你」

映彤:「係囉繼續擦鞋囉」

miss:「傑仔我都知你平時成日吹水

不過都唔好咁離譜丫

淨係話高中幾年教誨咪得囉」

映彤:「咪係囉」

大家閒談幾句，

氣氛相當融洽



原本都冇乜野，

直至見到有兩個女仔入嚟

當然啦我淨係見到一個啫

個幾月冇見，

今次係第一次見返

同我想像中冇乜唔同

著咗一條白色露肩裙，



好似一般女仔咁樣

再加對白色高踭鞋

好唔好彩，

跟住我見佢慢慢行過嚟

映彤佢就睇唔到

因為嗰陣我同miss係對望傾緊計，

映彤企喺miss嗰邊

亦即係話，

著住白色裙嗰個女仔係喺映彤後面向住我個方向行上嚟

講真，

心跳真係冇得呃

嗰刻我係好清晰聽到噗通噗通

其實我好唔想聽到

因為一聽到就代表我個反應出賣緊我

唔想自己嘅心跳再一次因為佢而急劇跳動

好明顯我就唔能夠如我所願啦

當佢越嚟越近我，

我就望住miss

借勢望住佢後面嗰個女仔

佢對眼只係望住前面，

完全冇望過左右

直至行到去隔離，

我先醒起有樣野，

特別望清楚佢條頸

空無一物

其實佢已經帶出咗一個訊息，

從來只有我一個人放唔低

今日呢個畫面絕對係不折不扣嘅證據。


跟住都冇乜特別，

謝師宴嚟嚟去去都係咁上下

食飯傾計影相

我當然都做足，

趁有時間梗係集郵

唔係嘅我比平常人重做多咗一樣

就係眼尾係咁望住頭先著住白色裙經過嗰個女仔

同其他人有講有笑，

一啲唔妥都冇

咁又係呀點似我咁冇用

講咗咁耐呃咗咁耐

都氹唔到自己走出呢個局面

跟住去到十一點就走人，

佢地有下場

我呢啲毒撚就梗係冇

返屋企瞓覺啦

同埋我好想抒發情緒

而目前個環境我係唔會亦都唔想抒發

一定要返屋企，

返到去自己坐喺床度，

我仍然記得幾個鐘之前見到佢嗰個反應

心跳係最直接不過

邊個都可以唔知，

除咗自己

好難扮唔知架，

我喺度諗，

唔係話想放低咩

點解放唔到

問心我真係好努力去扮冇野

我亦都覺得頭先表面上好成功

不過內在有咁嘅感覺，

話我知根本就冇揼低過

嗰刻我真係明白

世界上唔係好多野努力就得

我已經唔係講一啲好天方夜譚嘅野，

淨係講唔記得一個人

我都做唔到

日頭對住其他人甚至係生我出嚟嗰個老母，

我都可以辦到好灑脫

唯獨一個人嗰陣，

我真係冇能力保持灑脫

最痛嘅係，

人地已經唔放你在眼內

唔單止睇你唔到，

就連你送俾佢嘅野都已經冇戴喺身上

以前講嘅所謂諾言，

去到呢一刻已經變成廢話

生活完全唔受影響，

至少我睇到亦都深信係咁啦

人地得而你唔得

誰勝誰負，

我諗都一目了然啦。