嗰刻嘅感覺我都唔識去形容

我只可以話自己唔係好似電視嗰啲男主角咁樣

喺度喊苦喊忽,

哈哈

咁我因為我唔係男主角啫



當時我個腦諗緊乜野

我真係答你唔到

因為係一片空白

成個世界得返我嘅呼吸聲,

隱約都聽到少少心跳聲



而我淨係識望住封信,

我有諗過自己係咪發緊夢

跟住我再望倒喺地下嗰啲幸運星

同埋好耐冇見過嘅字跡

我就知係千真萬確



絕對唔係發夢

三千幾日之前,

佢地就已經喺度

我問自己,

係咪我唔夠了解佢呢

定係我俾唔夠勇氣佢

搞到佢做咗咁多野離我而去

好亂,



我真係唔知諗緊乜

明明我知道回顧係冇用

反正都改變唔到,

唔知點解我識講唔識做

講到尾我最憎都係自己

點解一直都放唔低

如果一早放低咗,



我就唔會等待今日嘅來臨

係咁嘅話我就唔會知咩事,

我當我真係記得今日要做乜

真係放低咗咁咪唔會有任何情緒

有時覺得自己真係好冇用,

係咁提住自己一啲幫助都冇

定係打從心底唔想忘記,

一路提住自己唔記得,



其實就係想自己唔好唔記得

點都好啦,

冷靜完之後我終於知道自己要做乜

總之你講嘅要求,

我一定會應承你

幾時都係咁。


打過去之前,



我點都要搵一搵另一個人

唔使問就梗係映彤

我有冇嬲佢

講真真係冇

以我認識嘅筱瑜同埋映彤,

依家呢個做法係合情合理嘅事

筱瑜當佢有一件強烈意願嘅事,

佢一定會清晰表達出嚟

更加希望有人會配合佢

映彤亦唔使講啦,

佢同筱瑜咁friend

有要求而又唔係犯法嘅

成全係理所當然嘅事

或者從旁人角度去睇

映彤一啲都唔同我講好似好衰

咁當初又係我唔想提起筱瑜先嘅

嗰陣唔知成件事係咁架嘛

同埋映彤同兩個都咁friend

站在佢立場去睇,

的而且確好難做嘅

我唔知筱瑜展示咗幾大決心俾映彤睇,

逼使佢一定要配合

無論如何喺呢件事上面,

我都唔會怪佢兩個

講完一輪廢話,

終於打到俾映彤

映彤:「做咩呀

係咪今晚冇飯食搵我呀

今晚唔得呀約咗男朋友呀sorry

我:「可唔可以唔好咁好自信呀

當正個個打俾你就係約你食飯

映彤:「你條友打親嚟有咩做啫

九成咪係食飯

我:「咁今次你真係估錯喇

映彤:「做咩啫

我:「知道咗喇

你兩個都好野丫

映彤:「下

我:「唔使扮野喇

我打過嚟唔係想鬧你,

你兩個真係犀利

係得我蒙在鼓裏

映彤:「你

點解會知嘅

哦我記得喇,

佢有提過

我:「呢九年入面你一直同佢聯絡

映彤:「嗯,

中間發生好多事

你打過去等佢自己講啦

其實中間有幾次呢,

我想同你講佢嘅近況

係佢千叮萬囑叫我唔好講

我:「咩事呀

映彤:「佢應該叫埋你個friend唔好同你講佢嘅近況

係咪叫司徒呀

總之佢話有個親戚同你好friend嗰個。」

我:「咁我都知

佢唔絕就唔會做咁多野啦

我絕對明白佢係一個好有決心嘅人,

第一日識佢已經知係

映彤:「就算佢唔好叫我同你講

我都唔會喺你面前提起佢

識咗你幾耐呀

你覺得我會唔會唔知你放低未丫

跟住我冷笑咗一聲

映彤:「你嗰三個女朋友呀

嗰啲共通點加埋,

根本就係佢

特別身高同埋髮型

根本全部都係同一個類型,

內在特質,興趣呀我就唔知啦

不過我估都差唔多

我再一次無言

真係呢,

次次一講起佢就係咁

映彤:「打過去啦

佢一直都等緊你呢個電話

我:「嗯