《一零六四》: 特別篇
是咁的，我叫連浩翹。
《一零六四》入面嗰個男主角。
其實接下嚟嘅情節，唔算係啲咩外傳。
只係呢一年嚟小弟嘅感受同埋某啲回憶。
所以我索性叫做「特別篇」。
係咁嘅，有睇過《一零六四》嘅讀者，應該都知道我同愷淇已經分開咗一排。
詳細係點，我就唔喺度講。
要知嘅應該都知。
—————————————————
時間，喺不經不覺間流逝得好快。
自從分開，我又回歸返一個人嘅生活。
其實冇咩特別嘅，咪都係咁過日子。
只係，有種莫名奇妙嘅感覺湧上心頭。
其實我已經唔太記得當時分開嘅過程係點樣，只係記得佢攬住我喊嗰個表情。
唔知點解我當初會做個咁嘅決定。
去到今時今日，都唔太知道。
嗰陣差唔多俾呢度啲讀者屌到屎忽開花。
咁講啦。
其實已成定局嘅事，就無謂再嘗試改變。
寫呢個特別篇，亦都唔係抱有咩目的。
單純想搵個地方講下自己嘅諗法。
老老實實，啱啱分開時嗰陣，內心係同大部分男性無異。
「爽呀！終於解脫！」
唔洗成日報到，唔洗時時刻刻睇住部電話。
唔洗嗌交，唔洗顧慮咁多嘢。
自由嘅日子終於返嚟我嘅世界！
可以瘋狂寫文、睇動漫、打機，快活！
一開頭，我真係咁樣諗。
我呢，係嗰啲獨自生活都冇問題嘅人。
因為我好識得享受寧靜嘅時間。
不過香港咁嘅處境，我實在開心唔到。
運動以嚟發生咗咁多事，大家都好無助。
咳，好似扯遠咗，講返我同愷淇嘅故事。
雖則話分開。
但我哋喺分開之後，都有保持聯絡嘅。
間中會約出嚟食個飯，交換下近況。
啲人話「真心愛過，係做唔返朋友」。
其實呢句說話好大程度上係正確。
但就要睇下雙方點樣去演繹。
可能我講得有啲玄，不過呢層唔重要。
記得有一次打邊爐，我哋都傾得幾開心。
好似返返去Part緊組爸組媽嗰陣咁樣。
「點呀你，呢排有咩搞呀。」
「都係寫下故，踢下波咁啦。」
講起寫故，不得不承認。
初初掛住寫文，有時真係忽略咗佢嘅感受。
不過都過咗去。
「咁你又點呀，有冇新仔？」
「返工嗰度都有人想追我㗎！」
老實講，以佢嘅條件。
呢個答案，我並唔意外。
只係好似有啲奇怪嘅感覺。
其實一齊咗咁耐。
大家嘅關係已經好似屋企人咁。
有異性向佢示好，我都替佢開心嘅。
應該，係掛。
嗰陣時，我經常問自己一個問題。
事實上，去到呢刻我都唔太識答。
或者，係想逃避。
不過算啦，有啲嘢唔洗知得太清楚。
記得上年我生日，佢都仲有同我食飯。
仲送埋禮物俾我。
佢的確係一個好好嘅女仔。
我唔知用咩文字去形容，總之就好好。
「估你唔到...」
「多謝。」
不過我生日之後，迎嚟嘅，係十月。
開真槍、中大、理大，我就唔再作補充。
大家都知發生咩事。
「Safe？」
「Safe。」
嗯。
雖然係咁，但佢間中都會Whatsapp下我。
Send返以前一齊嗰陣嘅相俾我睇。
問我記唔記得幾時影、喺邊度影之類。
當然我唔會全部記得。
不過大部分都仲有印象，知道係幾時發生嘅事。
又有一次唔知聖誕節定幾時，佢話想交換禮物。
咁我Ok嘅，冇咩所謂。
點知成件事好蝦碌。
我本身買咗對鞋俾佢。
但最戇鳩嘅係，我買細咗一個碼。
「你唔係著呢個碼？」
「咁都記錯。」
咁我認自己嘅記性係好差。
呢一點，由中學去到而家都冇變。
結果，我要拎對鞋返去換，再寄俾佢。
至於點解要寄。
都係唔太記得。
寄嗰陣仲差啲唔記得佢屋企地址。
喺度搵Whatsapp呀、IG呀、Facebook呀。
好彩最後都寄啱咗。
「收到你份禮物，多謝！」
唔洗客氣。
如是者，又再過咗一段時間。
差唔多今年年頭咁上下，大家都已經好少聯絡。
用返一句好老套嘅對白。
就係「佢有佢嘅生活，我有我嘅忙碌。」
或者，係大家都漸漸明白一個道理。
又或者，係逼自己去接受。
又有一段時間，佢去咗旅行。
跟手寄咗張Postcard俾我。
「你仲幾好嗎？」
「好似，慢慢習慣冇你喺身邊嘅日子。」
唔知佢寫呢一句嘅時候，係咩心情。
至於我，睇到呢句嘅時候。
簡單嚟講，有兩種感覺。
兩種感覺，用一句說話，就可以概括。
就係：
「呼，佢似乎，終於都放低咗我。」
大概係咁嘅感覺。
唔知你哋明唔明。
有一晚，我得知咗個消息，就係佢已經有新男朋友（如果你有睇，唔需要刻意探究我點解會知）。
Anyway，嗰晚我不停同自己講。
「佢終於都肯踏出新一步。」
記得初初分開，佢都仲好唔捨得。
其實由我嚟講上面嗰句，好諷刺。
因為到呢一刻，我都仲係一枝公。
結果，仲未開始新一段感情嘅。
反而係提出分手嘅我。
你話搞笑唔搞笑。
其實呢一年嚟，唔係冇對象嘅。
只係，唔知點解硬係冇心動嘅感覺。
唔再係見到靚嘅女仔，就產生好感。
唔知你哋係咪都係咁，至少我係。
我成日同自己講，試下啦，試下啦。
但結果都係唔得。
冇Feel，就係冇Feel，迫唔嚟。
最後，一直平平淡淡咁，去到今日。
我哋已經好幾個月冇聯絡、冇接觸。
似乎。
大家已經徹底從對方嘅生活之中消失。
可能睇到呢度，你會屌鳩我。
「講到咁撚慘！咁當初你又分手！」
屌，邊有得咁講。
人同人之間嘅關係，唔係三言兩語可以解釋。
有時可以好堅硬，有時可以好脆弱。
旁觀者當然可以大條道理分析整個過程，但當你真係置身其中，又係第二種講法。
每個人嘅故事都唔同，我都係純粹分享下。
唔知係咪寫咗故之後，個人感性咗。
間中都會諗起某啲事。
其實唔係我特鳩登去諗。
只係每次經過一啲地方，嗰個人嘅身影就好自然浮現喺眼前。
冇辦法。
我而家會去嘅地方。
大部分都同佢去過，實在太易聯想起嚟。
仲記得啱啱一齊嗰陣，真係糖痴豆咁，可以一個禮拜見四五日。
拍拖嗰陣時呢，地鐵都仲未淪為黨鐵。
大家約出街會直接約喺車站嘅某一卡等。
打個比如，假設今日約咗喺旺角睇戲，我哋就會直接喺九龍塘站，某一架駛向旺角方向嘅地鐵上面等。
因為我係東鐵線，佢係綠色線，如果係去旺角嘅話，咁最佳會合地點當然係九龍塘。
我會企喺九龍塘站嘅月台。
而佢就會話我知架鐵幾時埋站。
「下個站到！」
「係咪呢架？係我就上！」
一上到車，就會即刻拖實對方。
有時纏綿啲，會攬到實一實。
你哋知啦，我係一個足球員，每個禮拜嘅夜晚都有比賽。
而佢，幾乎無缺席過。
佢會坐喺場邊，默默睇住我踢波。
完場之後，佢會遞枝水俾我，拎張紙巾幫我擦下汗咁。
我啲隊友甚至已經習慣咗佢喺度睇波。
如果佢唔喺度，反而啲隊友會問。
做咩今日唔見佢嘅。
有陣時啲隊友表現得麻麻，我會好躁底。
而佢會偷偷哋問我咩事。
我就同佢講，呀邊個邊個踢到成Pat屎咁。
「你係咪嬲？」
「唔係，邊有。」
其實喺香港拍拖，真係冇咩地方好去。
唔係旺角就九龍灣，再唔係就葵廣。
不過去邊都唔係重點。
重點係同邊個一齊去。
「你好靚。」
「我不嬲靚。」
「但係...」
「但係？...望邊度呀你！」
「Sorry sorry，當我冇講過！」
愛情就係咁，一個願打一個願捱。
你串下佢，佢又扮下嬲。
嘻嘻哈哈咁就一日，幾快樂。
同好多情侶一樣，我哋都有去旅行。
嗰陣就嚟完Sem，佢話不如嚟個台北快閃。
我就梗係冇所謂，有得玩就夠。
有一晚，喺夜市見到佢好鍾意嘅卡通人物。
你知台北好興嗰啲掟飛鏢呀射汽球呀嗰啲。
咁我見隻公仔幾得意，佢應該會想要。
但我玩咗幾鋪都掟唔到返嚟。
「真係再試？」
「試多一次。」
當然，最後我梗係掟爆曬啲汽球。
拎咗隻公仔，佢笑到見牙唔見眼。
仲有佢好唔鍾意收花。
話覺得好唔實際。
呢樣其實都係優點嚟嘅。
慳返啲錢，拎嚟同佢食嘢好過啦係咪。
不過咁。
一段感情，有開心，自然有唔開心。
我哋都唔係冇嘈過交。
拍拖後期仲越嘈越多。
不過好多時，都係我唔啱。
而家望返轉頭，真係想同自己講返句。
「我都幾戇鳩。」
事實上，雖然係成日嗌交。
但可以肯定咁講句，大部分都係開心嘅時間。
雖然，呢段關係好平凡。
食嘢呢，一係屌譚，一係老麥。
食嚟食去都係好普通好平民嘅嘢。
但，已經好滿足。
「不如叫小食。」
「我想食皮蛋。」
雖然我哋會好似其他情侶咁樣行街。
即係會拖住、橋住對方。
但好多時我都係行先。
因為我會企喺前面派膠，做啲戇鳩嘢。
例如，大大聲同啲三唔識七嘅人講嘢。
比如有兩條友喺街傾緊偈。
經過佢哋嘅時候，我就會大嗌。
「係囉！我都係咁話！」
會激到佢紮紮跳。
又例如，我會喺6ixty8ight拎起個Bra。
「呢個Size啱你喎。」
「喂！細聲啲呀！！」
「啦啦啦～」
到行完街，食完夜晚嗰餐。
我哋又會喺海邊慢慢散步、傾偈。
「嘩！學生妹！正呀！」
「係咪想死？」
靜靜咁漫步，享受寧靜嘅一刻。
望住個海，覺得好舒服。
其實我都慢慢習慣一個人嘅日子。
都冇得唔習慣啦係咪。
可能你會問我，咁你後唔後悔。
不過，重要咩？
其實係唔係愛一個人，睇對眼就知。
喺佢嘅眼神裡面，見到自己，見到你哋。
回顧返呢一點一滴。
一切已成往事。
不過，我哋都會邁向新一頁。
希望，你已經搵到屬於你嘅幸福。
呢一個特別篇，真係冇特別意思。
純粹係個人感受，無須多想。
多謝睇曬佢嘅你哋。
仲有唔夠一個鐘就係你生日
喺度同你講聲生日快樂
「特別篇」 - 完