[喪屍][人性?][政治?]在喪屍橫行的年代裏，我只想做一個人: 14 望鄉者與流浪兒
「喂，呀嵐。」
「嗯？」她看到我手上的東西，睜大眼睛，一臉不信，「你......你竟然......」
杜嵐接過錢包，「估唔到......你竟然記得。」
「你話過有好重要嘅嘢喺入面吖嘛。」
她看著一張小小的相片，我好奇的問：「呢樣就係你指嘅，好重要嘅嘢？」
她微笑著，淡淡的月色之下卻見她眼睛濕潤，「佢哋係我爹哋媽咪。」
那是一張有點泛黃的寶麗來照片。背景是嘉年華會之類的，正中是一位小女孩，大概十一二歲的年紀，有點靦腆的笑著，兩手挽住一對臉帶微笑的中年男女。
「我......我只係過咗兩個月，就已經......已經有少少唔記得佢哋個樣。」
「呀嵐...... 」
「原本......原本呢個時候呀，我已經返咗屋企，喺蘇格蘭嘅屋企。佢哋知道我返嚟，一定會做好多嘢歡迎我，有時仲會叫埋以前high school嘅同學嚟，想畀個驚喜畀我......佢哋會整好多嘢食呀，haggis，scotch pie，rumbledethumps......之後，爸爸會拉我去後園，叫我陪佢觀星，但佢其實咩都唔識，最初點樣用望遠鏡都唔知，但係......但係咁都好開心呀。媽咪會靜靜哋咁坐喺度睇書，terry會坐喺媽咪膝蓋上面訓覺......terry係一隻黑色短毛貓，今年四歲喇，唔知係咪太耐冇見，佢成日都唔理我，但有時我做緊嘢或者睇緊書嘅時候又會走過嚟喵喵叫，要我陪佢玩......如果以前啲同學有嚟玩嘅話，我哋通常會喺我間房傾計傾通宵，最好玩就係聽到腳步聲，媽咪入嚟睇下我哋訓咗未嘅時候就馬上走返入被窩，媽媽走咗又繼續，好似貓捉老鼠咁......」
「呀嵐...... 」
「成個八月呢，edinburgh會有好多表演。我哋屋企渣車去都要三四個鐘，一留就會留好多日，因為真係好多嘢玩呀。佢哋會有軍樂隊表演，打好大嘅鼓，著哂軍服咁吹小號呀，風笛......條街日日夜夜都好熱鬧，因為當地人同遊客都會出哂嚟，有好多人賣藝表演架，畫人像畫，男人著花花綠綠嘅裙，玩手風琴，風笛，跳舞，唱歌......」
「喂，呀嵐......」
「我記得有一次，屋企有白蟻，滅蟲公司嚟到話要搞幾日，爸爸就索性帶咗我去探佢一個識咗好耐嘅朋友......已經係幾年前嘅事，爸爸嘅朋友住喺highland，我記得......我記得一路嘅風景都係山，草地，森林，湖，好耐好耐先見到一兩間小屋，有時天氣唔好，所有嘢都好似灰濛濛咁，好天嘅話，陽光照射落嚟，好多嘢都好似閃閃發光咁——山頂上面嘅雪，湖面嘅水波，草上面嘅露珠......爸爸嘅朋友有間細細嘅釀酒廠，佢畀爸爸試下佢釀嘅威士忌係咪好飲。我問我可唔可以試下，爸爸話唔可以，我唔制，最後佢畀咗少少我飲.....我成世人都未飲過咁奇怪嘅嘢，個頭好暈，行路都唔穩，仲俾爸爸指住嚟笑......之後爸爸嘅朋友帶我哋出郊外，佢哋去睇植物，我就騎一隻細細隻，毛好長好長，好得意嘅馬，一路行，我見到嗰啲牛......有好長嘅角，同好長又好多嘅毛，啲毛遮住眼，幾隻有大有細咁走嚟走去，佢哋可能係一家人。之後又有啲角好大嘅鹿，跑過田野，草地，牧羊人喺遠方趕羊，我走咗入去一個森林，之後...... 」
「喂，醒下呀！」我手一拍到她肩膀，她緩緩轉過頭來，早已淚流滿面，淚水落在相片上，劃過塵封其中的珍貴回憶，一點一滴的回到地上。
「我......我好想返屋企......我好想返屋企呀......」
她始終堅持著，不讓自己放聲大哭，只把頭深深埋在胸前，捏緊拳頭的手在輕輕發抖。其他人事實上早已驚醒了，但沒有作聲。
我突然明白，她不屬於這裡，她不屬於這個城市，這裡不是她的家鄉。然而她被迫滯留在此，被迫與這個失去希望的城市一起被埋入屍體與鋼筋水泥之中，你與我也無法了解那是甚麼感覺。
次日，我們如常外出搜索。
附近的民居多數已經被洗劫一空，中門大開，我們見到也只是慣例的進去看看，不能期待可以找到許多有用的東西。一些住宅仍然上鎖，sam這時大派用場，只是這些住宅也不一定有糧食或者甚麼有用的東西，大概是因為屋主已經逃走，離開前帶上了一切物資。有時幸運地會發現一些單位仍然未被入侵，那些地方屋內通常會有喪屍，但數量不多。這些地方可以找到食物，數量也不多，畢竟事隔這麼久，能吃的只有罐頭，一些未開封的乾糧，其餘早已腐臭變壞。
你無法想像打開一個缺電，放置了數十日的冰箱，裡面飄出來的氣味有多難聞。我突然發現在現代社會，特別是香港這種十分發達便利的社會，你通常不會屯積許多食物在家。白米可以放多久我不知道，但發現到的裡面都已經長滿蟲。像呀禮這般會沒事就儲蓄一大堆糧食的人真的很少，因為社會實在過於方便，而雜貨店，超級市場等等卻又已經被洗劫一空。
「老公？係咪你呀？」我們面面相覷，想不到這裡竟然有人。
我們在屋內東翻西找，雖然屋內十分整潔，但我們沒有留意。一個年輕的婦人，抱著一個男嬰，旁邊一個小男孩在拉著媽媽的衣角。
「呀！你哋係咩人呀！」
sam一臉警戒，mk妹連忙說：「對唔住呀，我哋估唔到呢到竟然有人。」
婦人盯著sam手上的雜物，「你哋......你哋想偷嘢...... 」
mk妹一手搶去，放回原位，「梗係唔係啦，哈哈。」
「你哋.....你哋都係倖存者？有冇見過我老公呀？」
「你老公？」
「佢......之前出咗去想搵食物，之後就冇再返過嚟喇......」
「我哋冇見過。」
「媽咪，我好肚餓呀...... 」小男孩拉拉母親衣角，婦人低聲說：「唔好嘈！」
sam擺一擺手，轉身就走，我們也準備離開時，婦人叫住了我們。
「請問...... 請問你哋...... 」
「咩呀？」
「請問你哋有冇食物呀？我哋已經捱咗好多日餓......」
看也看的出來，婦人面黃肌瘦，抱著的嬰兒臉頰凹陷，已經連哭泣的力氣也沒有，旁邊的小男孩手臂又細又幼，皮包骨似的。
杜嵐沒有多想，伸手在背包找了一罐午餐肉，想給婦人時，sam一手搶去，「......你有咩可以同我哋交換？」
婦人如夢初醒，馬上回去找東西交換，遺下眼睛死盯著罐頭的小男孩和在桌上睜大眼睛看著我們的男嬰。婦人回來，拿了一堆有的沒的，錢，珠寶手飾，手提電腦之類沒用的東西，sam不住的搖頭，「我哋唔需要呢啲嘢。」
「但係......」
「你有冇......過濾器，淨水丸，繩索，蠟燭，火柴，電池，藥物，繃帶，武器，衛生用品或者清潔用品之類？」
「呢啲嘢，我一早已經拎哂嚟交換食物同水......」
sam搖搖頭，「走喇。」
婦人突然間跪了下來，「求下你！我哋已經餓咗好多好多日，如果再冇食物，冇水，嘅話，我哋就會......」
sam鐵青著臉，倒是杜嵐也開口：「sam，佢哋好可憐呀，瘦到咁樣...... 」
「可憐佢，咁邊個可憐我呀？」
「求下你，求下你...... 」婦人拉著兒子一起跪下，「我個仔已經餓咗好耐......我......我......我都已經太餓，冇奶餵我個bb，求下你，我哋真係好需要食物！」
「放開我！唔好扯我條褲呀！」
「我...... 咩都肯做......」她拉開sam的褲鍊，「我可以同你含......」
「屌！放開我呀！」
「唔肯？我......我可以畀你......」說著就要拉sam入房。
「頂你唔順！」sam把那罐午餐肉摔到桌上，「拎去啦！唔好再煩我呀！」
杜嵐把一枝裝滿一半的水放到桌上，「攞去啦，雖然唔多......」
婦人跪著連番道謝，杜嵐扶起了她，sam不發一語的轉身離去，mk妹連忙追上，「喂，估唔到你會咁做喎......多謝你呀。」
mk妹的手搭到sam的肩上，sam止步，緩緩轉過頭來，「多謝我啲咩？」
「吓......多謝你幫咗佢哋......囉？」
「今日幫咗佢哋，佢哋今日有食物，聽日呢？後日呢？下個禮拜呢？」
這時杜嵐也出來了，「但......但係，咁樣始終都係做咗好事呀。」
「咁做嘅唯一作用，只不過係令你個心好過小小，但根本改變唔到啲乜嘢，食物食完，照樣係要捱餓......重點在於，佢哋根本冇能力去自己搵食物，冇能力去改變面對緊嘅困境。嗰個媽媽係好可憐，為咗個仔咩都肯做，咁又點？佢換取糧食嘅方法只剩底出賣身體，但唔會有男人對佢嗰副瘦到骷髏咁嘅身體有興趣，你明唔明白？你頭先所做嘅只不過係給予虛假嘅希望，靠施捨而得嘅希望。佢今日唔使出賣身體，可能聽日都要，甚至佢之前就已經做過，只不過係今日好彩遇到我哋......一切都冇變過，你同我都唔會幫到佢。」
說罷，sam頭也不回的前行，而mk妹看看低頭不語的杜嵐，搖一搖頭，趕了上去。
「我唔明白......」杜嵐低聲喃喃自語，「希望......虛假嘅希望......」她抬頭，「駱輝，我咁做，係咪錯咗？」
「你冇錯，sam都冇...... 」我拍拍她後背，「行啦。」
大部分喪屍像憑空消失一樣，只有偶爾遇上幾隻，不像之前街上隨處可見，反而是野狗，野貓等佔據了街道。
「呀女，等爹哋同你扮靚靚啦......」
我們走入一所看似已經廢棄的房子，誰知在那殘骸瓦礫之中，赫然發現一個男子，正替一具女童屍體梳頭。
那具屍體似乎已經死去一段時間，身體佈滿屍斑，口鼻流出暗紅的血水，眼球突出，腹部和四肢腫脹，部分區域有些血泡，內裡淡紅甚至青綠的液體在翻滾著。
事實上腐爛的屍體我們見不少了，倒沒有甚麼特別的，噁心的反而是男子那細心和充滿憐愛的聲線，好像他面前的是活人而不是一具已經腐爛發臭的屍體。
「咦，你哋係......呀女嘅朋友？」
「吓？」
「呀女，你啲朋友嚟參加你嘅生日派對喇......」
說著，男子輕輕的搖晃著屍體，眼球掉了下來，男子吃吃笑著，把眼球塞回眼眶，「你真係丫，高興成......咁......」說著微笑的指指旁邊，那裡只有一張破碎不堪的沙發：「你哋坐一陣先啦......我叫......我老婆出嚟。」之後就搖搖欲墜的走入房間，推著一張辦公椅，上面坐著一具成年女性屍體，死去的時間不及女童屍體般長，僅僅只是臉無血色，嘴角有些嘔吐物的痕跡。
「歡迎......嚟到呀女......嘅生日會......」男子回到女童屍體身旁，「首先我哋一齊唱生日歌先啦，happy birthday to you……」我們驚愕地看著男子自己唱完一首生日歌，之後他說：「許願先啦...... 跟住吹蠟燭......好嘢！」男子抓住女童的手拍掌，觸到了手臂上的血泡，頓時破裂，流出青綠的液體，並傳出陣陣惡臭，他卻渾不在意，「許咗咩願呀......世界和平？哈哈哈...... 」
他媽的......
「你哋去邊呀？仲未切生日蛋糕呀......」
我一發不語的走了出去，其他人跟上。看見這麼嘔心的場面，大家都沒有心情說話。
「喂，食狗肉好唔好？」sam突然這樣問，指著前面幾隻經過的流浪狗，有大有小，似乎是一家人。
「唔好！」杜嵐率先這樣說，mk妹也說：「我哋......未有需要去食狗下話？」
sam搖搖頭，隨即握緊消防斧頭上前，「sam，唔好呀！」杜嵐大叫想阻止sam，那幾隻流浪狗一聽見馬上逃走，sam奔跑了幾步便沒有再追，他垂著頭回來，「原來小姐你係傻架，大叫嚇走佢哋......」
「因為......我唔想食狗呀。」
「哈......你諗下我哋嘅糧食儲備夠食幾耐？三日？五日？兩日都未必頂唔到。八個人呀，要養八個人呀，大小姐。頭先幾隻狗，雖然瘦到皮包骨，不過是旦捉到一隻，都足以我哋食飽一日呀！而唔係，屌你老母一罐茄汁豆加啲生骨嘅米再加啲水，食完好似冇食過咁呀！你明唔明呀！」
「最後我哋會變成點？呀穎你尋日問我哋會變成點？我答你，我哋會變成頭先見到嗰條友咁！失去一切希望，自甘墜落嘅廢人！嗰條友冇癡線呀，佢畀你同我都仲清醒！駱輝！你都見到架，係咪？」
那男人的確沒瘋。他眼神由此至終都很閃爍，不斷察看我們的反應。屋子也不是被人洗劫的，他們不會把食物倒到地上，亦不會把傢俱摔破，這樣做毫無意義。大概是女兒因為不知甚麼原因死了，他和妻子決定吞安眠藥之類的自殺，女的死了，他卻沒死成。手腕上有些深淺不一的傷痕，大概想割脈，但他這時又不敢了，最後決定裝瘋賣傻，藉此逃避，沒有真的變瘋。不過看他如此虛弱的樣子，應該不久就會餓死或者渴死。
相當荒謬，也相當可悲。
我嘆了口氣，拍拍他肩膀，「我明你點解咁嬲......」
「明？你唔撚明！」他甩開我的手，「你哋以前嘅生活過於優渥......你哋未試過好幾日咩食物都未落肚係咩感覺，連瓦遮頭都冇係咩感覺，寒風好似劍咁劃過塊面係咩感覺，用報紙當被係咩感覺，生活得毫無尊嚴，連一隻流浪狗都不如係咩感覺！每一日，每一日周圍嘅環境都好似蠶食緊你，而你好似響個無底洞入面，出盡力想爬出嚟，但下面好似有吸力咁樣，而你頂頭嗰片亮光，漸漸咁縮小，最後消失，你明唔明白嗰種感覺係幾咁絕望呀？你哋唔會明白！因為你哋由出世嗰一刻就浸淫喺母愛入面，而我出世嗰刻迎接我嘅，就只有嗰對我僅有模糊印象，討論緊到底我出世係邊個責任嘅狗男女嘅爭吵聲！」
杜嵐低著頭，「對唔住呀......我唔知你原來......」
sam甩一甩手，逕自前行，那身影看來是多麼的孤獨。