[喪屍][人性?][政治?]在喪屍橫行的年代裏，我只想做一個人: 28 星之穹頂 下
「呀穎，你醒下啦！班喪屍殺咗你媽媽，唔通你要變到好似佢哋咁？」
我的話語絲毫不能拖慢她的步伐，但我依然不斷發話，呼叫——毫無疑問，在她變成喪屍那一刻，她已經死了，但我此時卻像白癡一樣，不斷重覆明知是徒勞無功的行為，祈求奇蹟會發生。
我早就知道會變成這樣......這不是擺明著的嗎？受感染就會變成喪屍。但到這一刻真的來到時，誰可以從容面對？
大概是被我剛才的大叫大嚷驚動，眾人趕到地下，瞥見mk妹已經變成喪屍，一時間不知如何應對。sam腳步虛浮的走前兩步，用嘶啞的聲音說：「呀......呀穎，係我呀，你唔認得我喇？」
「危險！」就在因為這一瞬的遲疑，mk妹打算咬向sam的咽喉，我在千鈞一髮之際奮身撞開了mk妹。
和她身型不符，這一下竟然沒有撞倒她，被撞開幾步之後她穩住身體，又馬上撲向我——
「碰！」
伴隨震耳欲聾的槍聲，mk妹在我面前中槍倒下。
「退後！」剛由樓梯跑下來的杜嵐，緊握著槍的雙手正劇烈顫抖，但此時她的命令之中有股不可違抗的威嚴。
sam衝前，抓著杜嵐的衣領，因為高度差距杜嵐差點被他整個人提起。他雙眼的被淚水浸濕，卻同時爆發出熾熱的怒火，惡狠狠的死盯著杜嵐，咬牙切齒，一字一句的說道：「如果你真係殺死佢，我一定唔會畀你好過。」
杜嵐一時間被sam的氣勢鎮住，但她沒有迴避對方的目光，堅定的直視sam雙眼，說道：「......讓開！」
「總之我唔會畀你咁做！」
我搭在Sam抓著杜嵐衣領的手上，「我哋只有呢一個辦法......你一直係個好理性嘅人，無理由唔知道呢一點。」
被子彈擊中大腿的mk妹，拖著血液汨拍流出的大腿，在地上匍匐前行。
我繼續道：「放手啦。」
「我......」
「呢個係呀穎嘅最後願望。」杜嵐輕聲說著，就似在自言自語：「你畀佢完成埋最後呢個願望啦，好冇？」
Sam的雙手漸漸鬆脫，然後他低著頭，逕自走到一旁，背對著眾人。
杜嵐咬緊牙關，眼角含淚，內心的痛苦在臉上表露無遺，眼神之中卻流露著前所未見的決斷，槍口對準在地上滿身血污的mk妹。所有人屏息靜氣，看著在地上的mk妹，慢慢爬向杜嵐，手腕在混濁的空氣揮舞，好像想抓著甚麼。杜嵐纖弱的背影面對緩緩進迫的威脅依然不為所動......是在動搖？在猶豫？或許只是純粹在瞄準——
「嘭！」
槍聲劃破寂靜，火光劃破黑暗。
mk妹腦袋被轟開一個大洞，帶血的腦漿流出。
她身體抽搐幾下，原來揮舞著，不知在追求甚麼的雙手終於握著了杜嵐裸露的腳腕，然後嘴巴裂開，看起來就似在笑一樣——是因為解脫了才笑嗎？我不知道。
槍聲驚醒了附近的雀鳥，吱吱喳喳的叫著，卻未驚動這個早已深陷瘋狂的世界。
「冇事喇。」原本一動不動的杜嵐，緩緩回頭對我們這樣說。儘管她微笑著，在淡淡的火光之下卻見她臉上的兩行清淚。
「碰！」sam奪門而出，白詠欣想追出去，但被權叔制止：「今次畀佢靜下啦。」
「家姐......權叔......」一道微弱的聲線在樓梯傳出，白詩婷倚著扶手艱難地下來，「你哋仲咩企喺度嘅？」
「婷婷！」白詠欣馬上過去扶著妹妹，「你仲未落得床架！」
「我聽到有槍聲，所以......到底發生咗咩事？」
「冇......冇事，我哋上返去先啦——」
「呀穎佢死咗。」呀禮沉聲的說道：「因為呀穎佢變成喪屍，所以呀嵐開槍殺死咗佢。」
白詠欣急道：「呀禮！」
「白詩婷都有知情嘅權利。」
「但適合而家呢個時候同佢講咩？」
「喪屍......死咗......？」白詩婷一呆，「點解會咁？......喺我昏迷嗰陣到底發生咗咩事？」
「婷婷，我哋返上去先，你而家最緊要係好好休息——」
「......呀穎佢係因為幫我搵藥，所以途中受到感染嘅，係咪？」
白詠欣一愣，「你點解......」
「雖然我係細路，仲要病咗，但你唔好當我係傻嘅！呀穎死咗，我都有責任，點解我唔可以知？」
「婷婷，我哋上返去先啦。」白詠欣半強行的把白詩婷帶回房間，回頭瞪了呀禮一眼，責怪他不應過早告訴白詩婷發生何事。
權叔抱起mk妹的屍骸，「......我哋去埋咗呀穎條屍啦。」
才剛步出石屋，權叔回頭對杜嵐說道：「呀嵐，你去休息下啦。」
杜嵐低頭想了想，點點頭回到石屋。
我們在屋後埋葬了mk妹。她墳墓只是一個拱起的土丘，一塊在石屋找到的石板充當她的墓碑，上面淺淺的刻著她的姓名和生卒。
「原來呀穎佢......過多兩個星期就生日......十八歲生日......」權叔看著mk妹的身份證，憂傷的說道。
我不知道該說甚麼。
時間已經接近日出，我們當中誰也睡不著，聚在石屋中的客廳，各自想著自己的心事。
「駱輝，你去邊？」權叔問。
「......我想出去透下氣。」
在石屋旁邊的樹林後方有一塊草坡，景觀頗為開揚，我想到了那邊，大概可以令原本壓抑的心情稍為舒緩一點。只需穿過一條小徑，眼前的景色就豁然開朗起來，翠綠的草坡展現眼前，杜嵐正坐在草坡上。
「呀嵐？......」
杜嵐指著星空，「駱輝，你睇下。」
我坐在她身旁，抬頭一看，只見滿天繁星點綴夜空，一點點的如螢火蟲般閃爍著，連那一輪明月也為之失色，本來漆黑如墨的黑夜此時呈海水一樣的靛藍色。在夜空中央，一條銀白色的，恍若薄霧淡雲的紐帶連繫著天地一方。
「好靚......」我不禁低聲讚嘆，「中間嗰條係......銀河？」
「係呀。我哋而家見到嘅，只不過係銀行系好小嘅一部分......響天空上面細細嘅一點，可能係一粒比太陽仲大嘅恆星，而其他看似漆黑一片嘅地方，其實都有無數恆星喺度發光發熱，只不過因為cosmological redshift，用肉眼根本見唔到佢哋嘅存在......」
我嘆息道：「喺呢一切開始之前，香港嘅天空污染得好嚴重，根本冇可能睇到咁嘅景色。反而人類一敗塗地嘅時候，先可以見到大自然最令人嘆為觀止嘅景色。」
她淡然一笑，「我好細個嘅時候呢，食完晚飯，我爸爸成日都會帶我去屋企附近嘅草地散步。爸爸係植物學家，佢會抱起我，指住入面唔同嘅植物，同我佢哋叫咩名，有咩特別，特性......但坐喺爸爸膀頭上面，我望向嘅唔係地下嘅植物，而係天上面。」
「......我成日都會好似而家咁，一個人坐喺度，望住個天胡思亂想。我哋而家響上面望到嘅，其實係來自好幾年，甚至係百幾年前嘅影像，透過光，穿越宇宙，嚟到我哋身處嘅地球。如果其他星球上面都有生物，而佢哋嘅望遠鏡又夠度數嘅話，咁佢哋望地球，就會見到一個細路女，騎喺佢爸爸膀頭上面，指住天空，而佢爸爸笑住咁搖頭嘅情景。」
「又或者係一個成身污糟邋遢嘅男仔，同其他人追住個波，跑嚟跑去嘅情景。」
她盈盈一笑，雙頰浮一個淺淺的酒窩，「有一次我同父母去俄羅斯旅行，去咗一個叫柯尼斯堡教堂嘅地方......嗰度嘅風景係點我已經唔記得喇，我印象最深嘅係，我自己一個四圍亂行嘅時候，見到一個墓碑，四周用鐵欄圍住。我隔住鐵欄，望住嗰個樸素，平平無奇嘅墓碑，唔明白點解要圍住唔比人入去......咁啱有個修女經過，見我望住個墓碑出神，就同我講葬喺度嗰個叫康德嘅人係一個哲學家。」
「修女帶我去到一塊石碑前，同我講上面寫係呢個人臨死前講嘅嘢，意思大約係......『有兩樣嘢，我愈諗就愈覺得佢哋令我內心充滿新穎嘅想法，同埋對佢哋嘅震驚以及讚嘆，而嗰兩樣嘢就係滿天嘅繁星，同埋我心入面嘅道德法則。』」說著，她望向星空，呆呆出神。
「康德......我以前讀書讀過，佢對道德嘅要求好高架，響佢果套框架之下，連講句大話都唔得，無論原因幾咁正義都好。」我笑了笑，「邊有人做到先得架。」
「係呀？......」她幽幽的歎息道，「天上面嘅星體有唔同種類，但都係根據嘅定嘅規律去運行，呢啲規律係全宇宙都通用......但係道德，人人都有唔同嘅睇法，有啲人好似康德咁，行為係咪道德，取決於動機而唔係結果，有啲人睇法相反，甚至有啲人根本唔將道德放在眼內。邊個可以決定邊個嘅睇法先至係正確？」
她頓一頓，續道：「就算我知道星體點樣形成，點樣運行，我知道宇宙入面一啲自然現象嘅成因......但我唔知道，人點解可以研發出呢種咁可怕嘅病毒，即使目的係幾咁祟高。人與人之間嘅距離，無論幾近都好，我哋所感受到嘅時間都係略有不同......或者就係因為咁，唔同人思考嘅模式，其他人永遠都冇可能明白。」
「我對宇宙好著迷，但我對道德冇咩特別嘅睇法......我甚至唔知道，我頭先親手殺咗我嘅朋友，到底咁做啱唔啱。喺醫院嗰到，我聽到serena講，變成喪屍嘅人，事實上都仲係生存緊......即係話，我哋一直以為自己殺緊喪屍，已經死去但身體仲識活動嘅屍體，但事實係，我哋一直都係殺緊活生生嘅人類。」
「我會咁諗，」我答道，「奪去佢哋生命嘅唔係我哋，係病毒。我哋殺喪屍，只不過係為咗自衛，為咗生存落去，甚至可以話係幫變咗喪屍嘅人解脫。」
「咁諗只不過係自我安慰。」她黯然搖一搖頭，「話唔定，變成喪屍嘅人，有朝一日真係可以康復，變返人類......」
「自我安慰有咩唔好。既然已經冇一個裁決我哋嘅機關同權力，裁決我哋自己嘅只有我哋本身。如果自我安慰可以令自己振作，令自己生存落去，咁自我安慰都冇咩唔好。況且，你可以確認，真係有方法令喪屍變返人類？」
她沒有回答，只是默然的凝視著我。
「望住我做咩？」我問。
「......我覺得，你真係變咗。以前嘅駱輝連殺一隻喪屍都心神恍惚......」她頓一頓，又望向天空，輕聲續道：「但係駱輝始終係駱輝，呢一點永遠都唔會變。」
「我覺得你都變咗。我以為你......我以為你會好內疚咁自己一個人喊......但你比我想像中堅強。」
她搖搖頭，並不回答，久久的才說道：「......我好討厭自己咁軟弱，我想變得堅強。我做咩都做唔好，一直都拖累緊你哋......我唔想再遇咩事嘅時候剩係識喊。係我令呀穎變成喪屍，當我哋喺醫院被喪屍包圍，混亂之中呀穎為咗救我而被喪屍咬中，見到佢膀頭上面嘅傷口，我先意識到我害死咗自己嘅朋友。」
「呢個唔係你嘅錯......」
她低頭不語，續道：「呀穎佢......佢一直都好堅強，但佢只不過係一個普通女仔，佢想自行了斷，最後都落唔到手。之後呀穎希望我親手殺死佢，你知唔知點解我會應承佢？」
我搖頭。
她定睛的看著我，語氣堅定，「......我會親手殺佢，因為呢個係我必須承擔嘅責任。」
......不經不覺間已經破曉，陽光灑落在她的臉上。雖然她說要變得堅強，但這時我才發現她雙眼紅腫，顯然是剛剛才大哭一場。
「駱輝，你知唔知係我個名『嵐』係咩意思？」
「......霧？」
「係呀。」她的眼睫毛輕輕顫動著，「我媽媽懷孕嘅時候突然作動，趕唔切去醫院，就咁響屋企就生咗我，咁啱好似而家咁日出。當媽媽辛苦完，抱住我，望住出面嘅景色，霧氣輕輕遮蓋住太陽，她突然間好感動，於是改咗『嵐』呢個名。」
興建石屋的人大概是為了欣賞這美景，才特意開拓我們身處的這片草坡。清晨的山嵐如同薄紗般輕蓋著刺眼的陽光，那熾熱的恆星在霧的後方形成一團柔和的光球，和煦的陽光穿透薄紗照耀著我們。
「呀嵐，你要連埋呀穎嗰份，堅強咁生存落去。」
「嗯。」
她含淚的眼睛看著我，輕輕握著我的手，微笑點一點頭。